ჩქინ დორთაში ოხვამერი
ჩაყვა ტომბა გეიოფში,
ქიგიობი ღვინი წკონდა,
თიცალ გურჸვილირი ვორექ
ვითის გეფშუნქ, ქუგოკონდა…
ჩაყვა დუდშა მახვიხვინე,
მოხანტილი ტომბა ჩაყვა
ილორს ელჸრ ქიგიოდვეს
სოხუმს ჯოხო ამდღა აყვა.
ეგბა გვალო გურქ გოხორცქუ
შურ გობტუე ართ მარაშა,
მუჟამ იბდათ, მუჟამ იბდათ,
ჩქი სოხუმშა დო გაგრაშა…
ხოლო ართშა ქიგიფშინათ
მუჭო გილეფშითი მოქვშა,
გითახვამშა მუჟამ იბდათ
ერებამო ჩქი ილორშა…
ჩაყვა ტომბა გეიოფში,
ქუდმოკინე, აშო ეფშა,
აფხაზს ხვალე ვაგარზინე
ვანდურებე მარგალეფშა…
მუ მოჭირა, ჯიმალეფი,
დუდი ვეგიდგინე თეშა,
ოაფხაზეს შქურნაფილო
კუნტათ ბხვამანთ კალკალეშა…
ჯიმა, სი მუს ოღვიზინა,
მა ქორთხინთი, გეზოჯათი,
ოაფხაზეშ ოხვამერი
ვენიტუათ ცვალი ართი…
სქანი რჯება ვამოხუჯუ,
მა ვაფქიმინ, თენა ვაშვე,
მუთ ქოფშუნი, აფხაზეფი
დუცუ დვანდეს კოლხობაშე…
გიწინქ, გური გონჯამილო,
გაჭყოლადარ ვამაფუნა:
კოლხემსუ დო აფხაზემსუ
ართ ზისხერი მიშაბდგუნა…
ქიგემიბით, ქიგემიბით,
ატარც ღვინი ვადარკათი,
ღორონთქ ქიმნას, მელე-მოლე,
მიღუდანი არზი ართი…
ასე განთხის ქიგებდირთათ,
მივოტუათ შურიშ ბუნა,
ვოჩხონუათ, ინგირს მელე
სასაფლებცუ მით ქოპუნა…
სი, ბოშკოჩი, მაკინ აშო,
ქაწომიდგი, ატარ ეფშათ
ჩქინ დორთაში ოხვამერი
ქომოლურო ქვინჯშა გეფშვათ…
გემანგარით, გეფულანდით,
ირო ვეჸი თენა თაში,
კოლხიშ დიხას გემშუმდანი
კოლხეფიში დორთინაში…
ხოლო ჭიჭე ქიმითვინით,
ხოლო ართი თუთაშ მორთა,
წჷ ვეჸუდა, წანას იშენ,
წანას იშენ იჸი დორთა…