ჩქინი ჭიჭე სამარგალოშოთ უშუჭყოლიდაფე იონა!
| ჩქინი ჭიჭე სამარგალოშოთ უშუჭყოლიდაფე იონა! by |
| გიორგი ციციშვილი. წიგნი I "მაფალუ" თბილისი 2007წ. ხ.25-27 |
ოფუტე ცაიშის, 1919 წანაშ 18 მესის, იონა მეუნარგიაშ გინოსვანჯაფა ბორჯის ჭკუდიშა მუნნარაგადა.
ჩქინი ჭიჭე სამარგალოშოთ უშუჭყოლიდაფე იონა!
მუჟანსით თელი ქიანა უდუშქირატვალი-დანჩხირითირე ეჭოფილი, მუჟანსით ჩქინი დუდიშულობაშ პირველ მურიცხიქ ხანი რე მუკორჩხინდუ ნი, მუჟანსითი თითოეულ ნაცია საჭირენს, მუჭოთი მანათებელი სანთელინი თეში ინტელიგენტეფიში-კულტურულ ჭყანას, აი თე შვანს თქვა- მოშინაფილი ჭყანაში მუჭოთი ართი საუჯგუშო ნძალა ნიმუთმოკორდუთი ამიერიშე დო დინმურთი უჩა -წკვარამი საფულეშა.
აი თე ფარანს, თე უკანასკნ ძირაფა დო გემოთხუალაში ბორჯის, სამარგალოშ კულტურაშ, მაჸოროფე საზოგადოება ,,მაფალუს,, სახელით ვეშემილებუ ბრელი მუთუნი მოსაშინეშე,ჭე მუთუნი ვარა ვემიბშინუე!
თელი თქვანი საქვარუა, თელი თქვანი ხანდა ბრელი მუთუნი შხვა დო შხვა საგნენს ეხებუ. თენეფი თითოულო საჭირენს დონწყუალა დო გონათუას თე სქანი ოჸოროფე თემიში გააჩინებელო!...
თე-ჟანს,ჩქი შევეხებუთი ყურადღებას მივაქცენთი თქვან საქვარუას, მუჭოთ მარგალიში ნი, ნამუქეთი მუთ შეალებედუ ნი თი წილი დო თია გემიშეღუ საერთო საქმეშა დო მარგალურ კულტურაშ სიხვამარდეს ხე შეუწყუ! ჩქი ვაფასენთ ირინერი თქვანი სამარგალოშ შესახებ ისტორიულ გიშაკვალუას, ლიტერატურულ ნაშრომს, თქვანი უდუშულადუ ირინერ მოხვარას არძო თი, მუჭო ევროპიული, თეში თაქიანი -ჩქინი ქიანაში, სამარგალოში ჯვეში დო ახალიშ მაგორალეფიშოთი, მუჭოთ მაგალითო: მურიე, ცაგარელი, გრაფ დე როჰანი, მარრი, ყიფშიძე, თაყაისქუა დო შხვა...
დო აი სწორეთ ათეჯგუა ინფორმაციათ საშუალება ქიმეჩი -გუნჯი სამარგალოს კარი,ჩქინი დუდი გაჩინებაფე კულტურული ევროპას. ..
თეწკუმა ვეშილებინე საპატიცემლო საზოგადოებას ვამუოშინე თი მუშობა, ნამუსითი თქვა მუთმახვარდითი ქალაქ ფუთიშ წამოკინას, რკინა შარაშ მიშაჸონაფას სამარგალოშა დო ბოლოს ერობას...
უმეტაშოთ თე მოშინაფილ მუშაობას თქვა გეჸუნდით თი უკმელა-მუნაფილ ბორჯის, მუჟანსითი უჩა ნძალა რუსეფიში პატონობა შურისი ეშაღალას მიჭირინდესი დო მოხვარე კოჩი ვაჩქუდუ ნი!
მარა მუჟანსი ღორონთ იპრიანუ დო გოთანდუნი , მუჟანსითი ბჟაქ გობარჩხალუ ნი, ჩქინი დუდიშულობაში მოსალამე მორღიაქ ელელუ ნი, აჲ თე შვანს მუჟანსით სწორეთ საჭიროდუ თქვანი ჯგურა გამოცდილი დო რჩქინელი ადამიანინი, აჲ თე ბორჯის უსქილადაფე, უსამართო სატკიარქ ამიერიშე გამიწომისოფეს თქვანიცალი საჭირო, დიო ხოლო ბრელი, შურო ბრელი მუთუნი ჯგირი დო სიკეთეში მოქიმინე პიჯი. ... ჩქინ ქიანას ბედი დო იღბალი ვაწყალენს!
მეტი ხანი ვარე იშ უკულინე, მუთი უჩა დიხას ქემუაბარითი ჩქინი მარგალური - ნანაშ ნინაში, მარგალური რაგადიში დემანწყუალი, ცაგარელიში უკულინე თი პირველი მაჭირხოლი, ნამუქ მეცნიერული ნინათი დაჭურჭულუ, დაამტკიცუ სინამდვილე-მარგალურ ნინაში რინი, თი პირველი მაჭირხოლი იოსები ყიფშიძე, ნამუქ საქიანოთი გეგმარჩქინუ მარგალური ნინაშ სიჯვეშე, მარა იში სიჯგირე დო სიხვამარდე, თე ირი ხალხიში პირველი შური დენმადგუმალარი იარაღი!...
თის უკახალე ქეგიაჸუნუ წყნარი,შვიდი, საპროფესოროდ დოტებული, საწმოხონოთ დიდი იმენდი, დიო ახალგაზრდა წანეფიში მენდულქ, სილიბისტრო ლომიაქ, ნამუქ წარმოდგენითი მუში ოდაბადე დიხასითი ვეეღირსე!
ჩქი ვფიქრენდითი ნამუდა თე ჟირი უდროო, უდანაშაულო ოხვამერი, ჭეხანს დაბაღუდუნი!
მარა ქარწყეთო ექ ვაბაღუ ნი!.. მესიში 15 ჩქი მოწამეთ გინიფრთით თიში, მუჭოთ ჩქინი მუხურს თქვათი მეუდინითინი!...
ნოტე მეტი იპითი თესხი ფური დო ჩილამურიშ მოწამე?
ნოტე მის მუ ვოწყინებაფეთი?
-მის მუ დუშეთი??
მარა მუ ოკო ბქიმინათენი,დიო ხოლო ბედ-იღბალისი უბრალო ბაყვი ვორეთიდო სოლე ონებუნი, თეურე მეპუნთი.
-მარა ენა მუთარე!
ოკონდა თქვა მეურთი, მეურთი სამუდამოთი, მარა თქვანი სახე, თქვანი ,,მა“ ამიერიშე ვეჸი ეშიჭყოლიდაფერი თი კეთილი ადამიანიშ გურიშე, ნამუთი თქვა გიჩინენდესე ნი! დაჯერებული ორდათი, მუდგაქ მობხვადა ნი, მუდგა ისტორიულ იღბალიში გემნაჭყანქი ვიპუათი ნი, მუდგა ფიტი დო ბორზალ გინმანთხანი, მუდგაქ იჸუასი ნი, სოჲშახ ვარა ართი ჩქინგანი ქეგესქიდუნი, თქვანი სახელი, იონა, ნამუშიანწკემა ბრელი მუთუნი, შურო ბრელი, შხვა დო შხვა ფერიში ამნახანტეფი წარმომიდირთუნანი, აჲ ათე სახელი იონა, ამიერიშე ვეშელასე, ვეშეჭყოლიდე, თი დიხა დო ხალხიშ გურიშე სოდე - დო ნამუწკალა დებადი, იგურე, გურაფაში უკული თიშოთ იხანდილინი დო ბოლოს თის ამიერიშე ქემიაბარითი! „Sit tibi terra levis“!