ჩქიმი სქვამი სამარგალო
სი რექ ჩქიმი ბჟა დო თუთა
გოპირელი გურიშ ვარდი,
მის აჭარუ სქანო ღურა,
ვაი, შური, თიში მარდი.
ჩქიმი შურიში თუთარჩელა
გურც პეულა დინახალე,
შხვა ჸოროფილ მა ვაპუნსუ,
ართი რექჷ ხვათახვალე.
სქანი ცა დო სქანი დიხა,
სქანი ზღვა დო სქანი გვალა,
უსქანეთი უმინჯურო,
ლანდიცალო გილვოვალა.
მოურს სქანი თუთარჩელა,
პეულერი ვარდიშორო,
სქანო ჭვილი დო ნკირილი,
აბა, მუჭო იპიქ მორო.
ღურა დღაშა ვემუოტენქ,
სქანო ლერსიშ ჭარუას,
ლერს ხომ თეში ვეჭარუ
საჸოროფო ვარჸუას.
გიხვამანქ ჯინჯღულას,
პირუა დო ტახუას
ნეტე სქანი ჸოროფათ,
აკა ქუმონგარუას.
ჩქიმი სქვამი სამარგალო,
სქან ჸოროფა ვორექ ფალო,
ხე დო დუცუ გოგილუა,
ჭიჭე ჩქჷჩქჷშ დიდაცალო.
შური დო გური რძღელი აფუ,
ჟი გვალა დო თუდო ზღვას,
სქან სისქვამე ჟი იჭკვაჭკუ,
მურიცხეფიწკუმა ცას.
გორჩქინუს ხვამილ აფუ,
სქანი ცა დო სქანი დიხა,
ზუგდიდ–ხობი, ფუთ, სენაკი,
ჩხოროწყუ დო წალენჯიხა.
ტეხირი დო ცხენწყარი,
მარტვილი დო აბაშას,
შხვადო სო ურც სქანი სქუა
სქან კიდირიშ მინარჩქვანს.