ჩელა'
| ჩელა' by |
| იოსებ ყიფშიძე "რჩეული თხზულებანი" თბ.1994წ. ხ.369-373 |
აშო, ჩელა, სი ჩერჩელა,
სი მონობას გეგაფილი,
სი უჩხონჩხე, სი სერგელა,
სი კისერი ელაფირი!
აშო, ჩელა, ბორო ჩელა!
ოჭკუმალო შხვას დუს არზე;
ეცალ რინას დიდო უჯგუ,
შუროთ ქიანასჷ ვა რდე.
აშო, ჩელა, ბათომიშა,
დუდჸ გეგიძუ სასწორიშა;
დიო ჯგირო დორხენდჷნა,
ბოლოს დუცჷ მერქექჷნა.
გო{ვ}უსვათ, ჩქიმი ჩელა,
ზუგიდიშე დარჩელიშა;
გოქარილი ვორეთ, მარა
ვე მჷმაშქვანა ტკვარჩელიშა.
აშო, ჩელა, ვიშო, ჯაგა!
ჩქინი ნახაჩქა რე ჸვანა,
მარა გვერდის მიდამჷღანა,
ჩქინჸ ნაშრომუს ვა მუჩანა.
აშო, ჩელა, ვიშო, ლომა!
ჩქი ბლასუნა მეტი შრომა;
ირო ქომუბშენთ, მარა
ვორეთ ჟირიხოლო ჭკოლა.
აშო, ჩელა, ვიშო, ბუსქა!
ნება ვა რე, ნჷმჷ კუსა;
ოში დიხას ჭყოლირი კოჩქ,
ჭუას მუ წამალი {ვ}უსვა?
შარას გილაბცანცალანთჷ
ალონიშე შქასერიშა;
ჩელა, თეში დობღურუთჷ,
ვე ითმართენა სარჯელიშა.
ჭკოლათ პუნსუ ჩქიმი ბუსქა,
ჸუდეს ვა რე ჭა დო ფურჩა;
ირფელი შხვაქ მიდამიღუ,
დო ჩქიმჸ ბუსქას ანწი მუ ბჩა?
ჰოჲ, ჩქიმჸ ჯაგა, ჩქიმი ჩელა!
დუდი მაფუ ონგარალი:
მათი დუცუ მონობხენა
ნგერჸ დო ტურა ოჭყვადალი.
ჯაგა, ლომა ბორკილეფი
სიღარიბეშჸ ჭოფილეფი!
დღას ვა გებხარებუთუ
შხვაში მონა-მორჩილეფი.
ჭურია დო ნაბადა რე
ჩქინი კლასი, გიმნაზია;
ჩელა, ლეტას ქაშენჯირი,
ინკორი დო იკვაზია.
ჩქიმი ჩელა, მუ გიწუა?
ვა გჷგეგებუ ჩქიმი ჭუა;
დუსუ მიღუდანი ჭკუა,
ნტერსუ ხვადუ დიდი ქუა.
ბოში ვორექ ჯგირი, მარა
ჯიბეს ვა რე ჭყელი ფარა;
რადგანს ღარიბჸ ვორექჷ ნი,
ჸოროფილსჷ ვა მუჩანა.
დღაშ დო სერით ქომუბშენქ,
ჩხურჸ მაწუხენს, მინი ჩხანა,
მარა ჯგირი ვა მჷკმოქუნსუ,
შქირენული მაფუ ქვარა.
ჰოჲ, ჩქიმი ჩელა, ჩქიმი ჯაგა!
მდიდარი რე გომორძგვილი;
ღარიბჸ ვორექ, მდიდარს მეჸუნს
ჩქიმი სქვამი ჸოროფილი.
ჯაგა, ლომა, მირჩქილით,
მუს გიწოლენთ, ქიჩინით;
ართო მიბრაგადუათ,
მუს ქიბჩინენთ, ვათუათ.
ჯაგა, ლომა, ბუსქა, ჩელა!
თოლსჷ სინთე ვა ნობღვენა;
მუ ჭირდჷ ნი, ვა ნობჩქვენა.
ასე ქობძირითი თენა.
ჩქი ვორეთ დამნაშავე,
ჩქინი დუსუ იბღუმპუნთუ,
ჩქინი სახეს ვა ვორწყეთ,
მაალ-წყარსჷ მეუღუთუ.
ჩქი უხაჩქჷნთ ქობალსია
არძა მუქთა-ხორასია;
ჩქი ურჩანთ ფარჩემსია
უსაქვარე კახმემსია.
ჩქი უკეთენთ დოხორემს
ნგერეფი დო ჯოღორემს;
ჩქი ვოჸოთანთ ტყვიასია
მუშას, ჩქინი ჯიმასია.
--
ჩქი ჩქინ დუსუ ბღალატენთ,
გერჸ დო ტურას ვამარგენთ.
ჩელა! ანწი მობაღუნა
ტვერჸ დო ლეტაში აშახუნა,
მათრახეფიშ მოთვინება,
ჩხურჸ დო შქირენიშე ღურა.
ერთობა რე, ჩქიმი ჩელა,
უძლეველი დიდი ნძალი;
ის ვჸარჯგინანს ნტერიშ ტყვია,
ლეკური დო ზაბარზანი.
მარა დიო თე ერთობა
ვა მიღუნა უბედურემს;
ოჭკუმალო აწჷვძჷთუ
ნგერეფი დო მელა-ტურემს.
ჯაგა, ლომა, ბუსქა, ჩელა!
ანწი გიჩქიდანი თენა:
შხვადო ვა რე ჩქინი შველა,
ჩქი ჩქინჸ ნძალა დამირსხენა.
ჩელა! მა გირჩენქ თეს,
ქიმწუვძახათ ჩქინი ნტერს:
გოუმორძგვას ერთობას,
გვერშაპიში ეკორთას!
ჩქინჸ ხესჷ რე ჩქინი ბედი;
ვარა ღურა-დასაჯება,
ვარა სრული გამარჯება.
ჩელა, მობლასათჷ ნტერი:
ლომი, თუნთი, ტურა, ნგერი,
არძა ჩქინი მაჭკუმალი,
არძა ღორონთიში ჭყელი.
დიბრთინუათ, ჩქიმი ჩელა,
თე სამოთხე მშვენიერი,
ბოროტება დოპილათჷ
დო იპიით ბედნიერი.