შურიშ ნართი
Jump to navigation
Jump to search
მიჩქუ ვორექ შურიშ ნართი,
მიარე დო მინშა ართი.
ინიშ-ინი ალმარჩქილე –
სკან სქილედის კინე დართი.
შარა რე დო თიშ იქილე
ბჟაშ კილეგანც ხოლო კანთი.
ქიგმოფორუ ცაქჷ ფსუა,
ლუბას მემიძ თიში თვათვი.
ჩხოლარეფიშ თოლიშ რზაფას
ჩქიმ შურ ხოლო გინმაჯინე.
ჩანარეფიშ შურიშ ლაფა,
თაქ მიძირ დო გუმაშინე.
შორც, ოხვამეშ ქვერსემ ზა რე
შურდგუმაშე მირეკუნცუ.
წანეფც ცაშა ეკვაზარე,
ყილოშ ტყები გინმოქუნცუ.
იშაყარუ ირფელ ჟიშე
დო ბორიაქ გოკონ ელას,
გურიშ ხიბაშ ჭიჭე იშო,
მივოჯინექ მერეკელას.
მოუღუნა სინთე, ნათი,
ტორონჯეფცუ გუა-გუა,
ლერსიშ ნე-ღვინ ინიქვანთჷ
ცაშ ოჭნახის ქანთელჯგუა.