შურიშ კარი
მიქ ენწყ დო ეიანწყინე
თე ქიანაშ შარა-კარი?
ირთაფ ქიანა უშულადო,
წყარ მისოფ, უბარს ქარი…
მის უჩქ რინაშ დუდ დო ბოლო,
ეკოხონ დო დიკოხონი,
ბრელს ძიუთ მეუღ შური,
ბრელსი გეძ კისერს ქონი.
ქიანაქ წართუა დო
ირჩქილუაფ ვაი-ვიში…
ქიანა თეში მუჭო წურსი,
გჷნარჩქინა ღორონთიში?!
კოჩის რჩქილათ ეშმაკიში
გოჭყოლადირ აფუ ჯიში…
კიბირეფსუ გოძირანს დო
ჸოროფა უღ ვარჩხილიში…
სოფელიში ხაფანგეფს,
ნაპოტიკას ეშმაკიში,
მართალ კოჩი მერიებუ
ჭყოლოფუათ ღორონთიში…
სოფელს ბრელი ცოდა ხვილუ,
ნაშაყარა წანეფიში,
მარა ირფელს გინმოწონუნს
მარდ ნაკეთებ მართალიში.
თეშენ ირო საჭირო რე
სიკეთეში მათასალი,
რულქ თოლი გაგთოიღას,
კურცხას ორე მაზაკვალი.
ვოცადუქი მარდი ფთასე,
მემიღ ჩქიმი მონკა ჯვარი,
ვამთქუალუ დღას ვარი
ჸუმენულს ქოფჩე წყარი.
ღორონთ სი რექ გინმაჯინე
თე ქიანას ირფელიში,
თეშ გილაფრთი, თეშ იბცხოვრი,
ირო მიღუდ სქანი შიში,
ორქო, ვარჩხილ ვამშაყარუ,
მარდ ეწოპუნდ პირჯვარიში.
ირფელ ჸუჩა ვამომღალუ,
მუთ გუაკეთ, მუთი ქიფში.
შურობუმუ თეში რენო,
თისით გილაბ მუში კარი.
ქარქ მოიღუ და, ვაგაიჩენდუ,
თის იღანსი ვიშო ქარი.
ოხვამერსჷთ თისი ფხვამა,
უხვამ ჩქიმი წინაპარს,
ღვინსი ფშუნდი მარდიანს,
მუწმომბუნდეს ხშირას ძმარს.
რეკჷნს, რეკჷნს, რეკჷნს ზარი,
მალას მურსი მაცხოვარი.
ეწოპუნა ქრისტეშ ჯვარი,
თიქ განჯ ჩქინი შურიშ კარი.
ღორონთ, მისი ეიაწონე
სქანი ძალა, ნასაქვარი?
მიმსახურ დო ვამკილუა
ჭიჭე ხანს შურიშ კარი.
ქართი
05.07.2017 წანა