ფრინველივით ვზივარ ღამის უბეში
Jump to navigation
Jump to search
ფრინველივით ვზივარ ღამის უბეში ავტორი: ტერენტი გრანელი |
ფრინველივით ვზივარ ღამის უბეში,
თბილისია ერთადერთი ნუგეში.
რა ვქნა, დროა ამნაირი წვალების,
მალე ტირილს დაიწყებენ თვალები.
შენთან ასე მოვიქცევი, აბა რა,
და ღრუბელმა ცაზე მთვარე დაფარა.
თბილისია და წამებას ავიტან,
დღევანდელი მზიანი დღე წავიდა.
ფრინველივით ვზივარ ღამის უბეში,
თბილისია ერთადერთი ნუგეში.