უჩილამურე ნგარა
ჩქიმ სენას მულვოხექ ამსერი
ხვალე,
დო თიშე ფიფრქე,
მუ რე რინა?
თუთას ელვოჯინექ, ინა დუც მიკმიჩუანც
მუნაფეფიშ იშო.
მა ყვარანო მაძირუაფჷ თუთა,
ყვარან რექ-და, გოსოფი თე გური სქანობურათ,
თუთა რექ დასურო-და,
გეგნიკერკელი ჩქიმ ტანს,
ქიგემტე სქანი ორქოთ გოჸილი ამნახანტი.
მათ თუთათ მემრჩქინანა უკული.
ადამიერობა კაპანი ჸოფე, ქვერსემი კაპანი,
ვენთირე ირო ენა.
სეფურო მემრჩქინეს დო ვარ, მითავარია მიდგარენო?
კოც დღას ვაცქუე ოკო ვახვადუნ თეში,
ვარა ართშა მიარკი შურო-და, წყარშა ქინოირღვანც
მუთ გიცქვაფუნ თის ხოლო.
მუშენ მიჩქუ თენა?
ვარა მის ოკო თე რჩქინა, კიბირო ქუნს ართიანს კათა.
დიხაუჩა ვარე ღორონთიშ სეფურ აკანი,
თეშენ მუს იფსოფუ გურც?
მიაშქვი, დღას ვეჸი, ბონ შარა
ირო ირთანდ დო იღიროკუდჷ.
ბონი თექ რე შარა ხვალე. ჟი, კვარჩხშე მაულარეფშო
ხოლო გებონებჷ თინა.
გლახა ქოძირენი, ჯგირ რენია ქოთქვი დო უჯგუშო
იჸონა სქან რინას.
ჯგირი, ფურს ქოუწყორე.
ათენა ოკო ადამიერს ირო, თენა ოკოდჷ დო ოკოდას იჸი ხოლო.
ჭერჭე გვერიშ დო კოჩიშ ზალამი ართი რე.
სვინაქირ ფერ გინოძჷ ასე ჩქიმ სენას,
სიაბარა გიშაღალირ ორთა ჩეთ გოქუნილი დინმოჯინე.
ათე ჩქიმ ნინაშა ჭარუა თის ხოლო საკვენო მიოჩქჷ.
მიქ გომრჩქინჷ თე ნინა მა, ვარა თინა მუ ოხვილურ მაფუ?
თეშ გურშენი, კოჩი მენდურებჷ ვარა მი მომფოთუანც?
მადინაფჷ ნინა, კუჩხით ჩარგაზელი,
დიდაშე მუკოსოფილი დო ანგარებულო გეტებული.
ასე ვაუჩქ სოლე იდასუნი,
დო ჭარი თე ნინაშე, სვენერობა გიშაწიმინდელ კათაშო.
მარა ართ რე -
მოჭარაფუანცჷ მუდგარენ დო
ბჭარუნქ.
ბირა ვარე ჩქიმ ორაგადე, გურიშ ჭუა რე დო ჭუაშე ეჸონაფილ
ნგარა უჩილამურეთ.
უჩილამურეთ ნგარა არძაშ უფურაშ რე კოჩიშო.
იშენ ვამაფჷ დინაფილ წიმი ულაშ მენდი.
ჩქიჩქუ დიდას დართუ.
თეს ფიფრქე, თაშ აწოიჩა
დო მუ ხოლო გინირთუ დიდათ, ვარა მუმათ.
აბა, ღორონთ რე მოწამე,
ვამოკოდჷ ჭარუა.
მუშენი მოჭარაფუ?!
სისმარც ვამწოპუნაფუქ, ამარ თარღია რე ირფელი,
კარაკანო იძირე მუმალი.
თაქ ვორეთ ჩქი, ჩქიმ სენა ცაშა მიდუღალჷ
არწის დო მუნაფაშ ინოხ დოუჩუალჷ.
დიხა ემბარილ რე ირ აბანც.
კუჩხი სო დუობიჯგუენი ვამიჩქ,
ნობიჯგი ხოლო მუ რე,
ფურინუაშ მუკნასოფა სქილედი რე
ადამიერიშ რსხულც ართ ცომცო მიშასქილადირი.
ეთი ართ ცომცი რე კინე უკული
ფურინუას შილებუანსუნი.