ულა (ზაალ ჯალაღონიას)
რუმე ცას გოძჷ მუნაფეფიშ ქექე ბონდღეფი,
თუთაქ- ორქოში ბორბოლიაქ შური გოქალჷ,
ასაგასაშე შურცუ აფუ გჷნაონდღეფი,
გეუფურინ დო ნოთეშ მუკე შარა გორქალჷ.
სონ წკურუმეფცჷ ასქილად ჩქიმ ალიშკიბირი,
კოსმოსიშ სქიბუს მურიცხეფიშ ქვირი გუფართხჷ...
გაბირუაფ-და, ირიათონც, შური, იბირი,
თანჯა ვაუღუ სქან სიმსეფცჷ, სიმორქ გუფართუ.
ჩქიმი შურიში ტიოზისჷ ვარჩქჷ ჩანარი,
დინოხურ ართო გეშამფუთქუ ზანთ დო პანჯიქჷ...
მათ ლერსიშ ვორექ ოშქაგურშე ეშმაჭარალი,
მარა მუთაქჷ ათეშენი მაშუ მა ჯგირქჷ!..
მორჩილც ჭარაში მაღორენდჷ ანახირეფი,
აჭიროთელცჷ ვაფშ მითინიში აშახოლაფა...
იშენ დორხველო ოლჷს ვორდი ალნახვილეფი,
მოკოდჷ ირო დიხაში ტება, ცას დოხორაფა.
მუთაქ გჷშართჷ!.. ქობქუჩუჩა იშენ ლერსისჷ...
შხვა თანკარიში ვეშჷმალებე ბარბანჩჲ, ბენება.
დუდმეჩამილო ბირაფიას ბირაშ მერსხილცჷ
ოშწანურეფიშ იშო მოკო გინომელება...
ზალამქ ვადმოსქჷდ ასაგასაში ინარინალო,
თე ოქიანუ ჩქიმ გურიშე ირო შორს ჸოფე,
ფსუა გოფაბჩე უთერუშა ოფურინალო
დო დიხაშ ოკო მუდგანერო გუხუ გოფსოფე!..