ულაშჲ ბორჯი
Jump to navigation
Jump to search
დოთირელე არძა ფერი,
გურც ანთასი ჭუა მობუ,
დუც გიმორე უჩა სერი,
ულაშჲ ბორჯი გჷმასოფუ.
ბონი შოშე სოთინჲ ვაჩქუ,
მარა ვამიღ ანწი მენდი,
უკოჩობაშჲ ჸვანას ვხაჩქუ,
აიშახ ბერგის ვთაკილენდი.
"მინ რექია"-თქუანქ გურით,
მარა ნარღი ვარე ეფი,
თი სერი დო ჩილამურით
ეფშა მაფუ ლაწკარეფი.
სი გიჸოთამ შხვაში ჩირე,
დღასჷ ვარდი ჩქიმი თური,
ეკონიათ ეწმაძირე,
სქანჲ თოლეფი გოსოფური.
ხუჯო მიჩქუ: ფორიაში
ასე დუბეს ქინიხვილუ,
სი შური რექ ბორიაში,
გელალუქ დო კინი პილუ.
ვათმაჩერდჷ იშენთ ორთა,
ღურუქ ჸალა თოლეფჲ განჯჷ,
ნაკეკინა, ნაგორგოთა,
გურჲ ოგურეს ალასვანჯჷ.
დოთირელე არძა ფერი,
გურც ანთასი ჭუა მობუ,
დუც გიმორე უჩა სერი,
ულაშჲ ბორჯი გჷმასოფუ.
2014 წანა, ღურთუთა.