ულაში უკულ იშენი ფსკიდუქ

From Wikisource
Jump to navigation Jump to search
please do not remove empty parameters (see the template documentation).
ულაში უკულ იშენი ფსკიდუქ
by ზაალ ჯალაღონია


 ულაშ უკულ იშენ ფსკიდუქ,
 მითა ბძირუნც ხვალე თოლო.
 ირთანც ცაში უჩა სქიბუ,
 სოთინ ვარე დუდ დო ბოლო.

 მიდართი-და ოკო დირთე,
 ვაგოკო-და გვალო ქორდა.
 ცა დო დიხას ნოღვე ქირქე,
 მინ ცორქო დო მინი გორდა.

 მუზმა წანაშ ნაგორგოთა,
 თოლიშ რობუს ინიფაფუ.
 გუმაშინე არძა ცოდა,
 ძირაფილ დო უძირაფუ.

 ბორჯის დუშუ ჭარაშ მორსა,
 ბორბოლიაშორო ტყობუ.
 შურდგუმაშე ვარე მორსხა,
 იშ ნახართა ირფელც გობუ.

 ღორონთ მიშა მიმოშკვანც,
 მა ვებრგუქჷ მოზიშორო.
 ათე ცა დო დიხაშ შკასჷ
 ჩე დღალეფ რჩქუ მოქვიშორო.

 ნაგორა დუც კინ იფჩუა,
 გოპკურცხინი ჸვანას ჭვე რდუ.
 ანთას წანაშ მომიღ ჭუა,
 ჩქიმ ჩილამურ გიგოჭვენდუ.

 ულაშ უკულ იშენ ფსკიდუქ,
 მითა ბძირუნც ხვალე თოლო.
 ირთანც, ირთანც უჩა სქიბუ,
 სოთინ ვარე დუდ დო ბოლო!