ტყურა (უჩინებუ)
| ტყურა by |
| http://www.kolkhoba.org/margtksk.htm |
ტყურათ ძიცინითი ტყურა მაფუ, მარა აწი დიბრჩინი დო წოხლე იფჩიებუდინ თიჯგუა ტყურეფი ვამათქვე. წანეფქ მიდამიღეს აზრი. უაზრო კოჩქ მუთუნ ტყურა თქუ და, მუში ტყურა ტყურა ქიყიი! მა წოხლე ტყურეფს იფჩიებუდინი, არძა მიჯერდუ დო მა ხოლო მართალ მაფუდუ ირფელ. ოდო მირჩქილით აწი.
პაპულ ჩქიმიში პაპულიში პაპული ძალამ სქვამ კოჩი რდუ. სისქვამა ზოხო რდას დო მუში ნძალა მართალო ნძალა რდუ. ამდღარიცალო ფშუ, ბაბა ჩქიმიშ დიარას ხინჯი ხორცქუდუნი, მუჭო გიოსხაპუ ცხენის დო ართი ხინჯი ქიდეეკინუ. სუმ დღას დო სუმ სერის თეში გერდუ. მიგიდა გილეშუნი ირი კოჩი თიქ გუუტუ ხინჯის, ხინჯიქ დოლოლუ დო ღალიქ მიდეღუ.
ბაბა ჩქიმი ჩქიმდე ეჩი წანათი უკულაში რდუ დო პაპულ ჩქიმიქ უწუუ ბაბა ჩქიმის: “სი დიჩილინ, ენა ძალამ ჯგირი რენია, მარა თი ბაღანა ირჩინუუში ვარწყექო?! მორთი, თინა ხოლო დოვოჩილათია!” თქუ. “დოვოჩილათ დო დოვოჩილათ! მარა მი მეფჩათ, მუში ოსქვებური თაქ მითა რენია!” -უწუუ ბაბა ჩქიმიქ ხოლო. პაპულ ჩქიმიში პაპულიში პაპულიქ: “ათეშ ნარღი ვაგიღუდას, მა დუბგორუნქია მიდგარენსი! მითინ ვაბძირი და, ჩქინ მაფაში ძღაბი იშენ ქიმეფჩათ, გლახა ძღაბი შურო ვარენია”, -უწუუ დო ქუდამიძახუ. მათი ქიმევრთი, მუთა მიჩქუნი თეში! მიჩქუდუკო მაფაშ ძღაბი აფუნა გურისნი, მევახოლუუდიო?! აწი მოვრთი დო გეგწვუდირთი.
ბაბა ჩქიმიქ ათეჯგუა სიტყვეფი მიწუ: “სქუა ჩქიმი, სი ვადირჩინინ თის ნუმ უჯინექ! დოგოჩილითკონი, გლახა ვეიყიირდუ. ჩქინი მაფაში ძღაბი სქანი ოსქვებური ვარენდა, გლახა ძღაბითი ვარე. სქან რჩინაფას ვუცადითდა, ეთით დირჩინუუ, უკული შხვას მუს ღოლანქ ეთისია! -თქუნი, მა გურქ მომირთუ, მიდგა მაფაშ ძღაბი მუჭო ფშქიდესმაქი. ასეიანი ჭკუა თიჟანს ქომიღუდუკონი, თეში მუჭო ფთქუანდი!
პაპულ ჩქიმიში პაპულიში პაპულიქ: “ვაკონდა, სი ძალათ ხო ვამეჩანქია?!” დო არ დოტკაჩუ ბაბა ჩქიმის. ბაბა ჩქიმიქ ინგარუ, იდუ დო ბაბა მუშის ფორჩას ქიგლუდოხოდუ.
მა დო პაპულ ჩქიმიშ პაპულიში პაპული ქიგვოდოხოდით ცხენეფს დო მიდავრთით. ჭიჭე ვიდითდა, ხოლო ბრელქ მალინეს. მუდგარენქ იყუუ, ქუმოვრთით სტამბოლიშა, მარა კარი კილერი რდუ, მი მინგაშქვანს?! ვუძახით, ვიძახით, მითინქ ხონარ ვეშიღუ, აშქურინეს, დოპილუნანია დო პაპულ ჩქიმიშ პაპულიში პაპულის გურქ ქუმურთუ. ქიმიანჯირუ კარს დო გეგნარღვუ. კარიშა მიშავრთით, ვემშავრთით, სულტან სულეიმანქ ქიმიკანკალუ დო: “ქო, ვაპილათ დო მუდგა გოკონანი, მეხვეწითია!” -მიწუეს. პაპულ ჩქიმიში პაპულიში პაპულიქ: “სი მუ გაღვენუაფუ თირიგი, ჩქი ეპჭოფუნთინ! ძღაბი ქოგიყუნსდა ქობძირუნთ, ქუმომეწონესდა, მიდეპონანთია!” -თქუ. მუში ძღაბეფი ხეთე გაგმიყონეს, მარა ართიქ ხოლო ვემმეწონუ. ართ-ჟირ დღას სულეიმანიწკუმა გაფჩენდით დო მიდავრთით შხვა არდგილეფშა. ბრელ იბდით, მარა ჩქიმი ოსქვებურქ სოთინ ვამაძირუ. ჩქინ ყუდეშა მიფშითინ, პაპული ჩქიმიშ პაპულიში პაპულიქ უწყარე ორომეშა დინოლუ დო დიშქვიდუ. ყუდეშა ქუმოვრთინი, მათი ქიდივბადი. ვირდუუდინ, მუქ მაღოლუნი ვაფშუ, ვარა ქოგიწიინდით.