ტვინშე მუკნატყვაცა
Jump to navigation
Jump to search
| ტვინშე მუკნატყვაცა by [[Author:გიორგი სიჭინავა|]] |
| გიორგი სიჭინა "რინა მოკო პელაზგური" თბ. 2004 წ. ხ. 108-109 |
- წყარიში ღალირი კოჩი ფუთქურც ოძღირკუდუა... გვალო იმენდიში გეწკურუას ეგებჷ ხოლო ფუთქურიში მოძღირკინი ქოუჯგუდას.
- წიკვილი ტანც წყარი ბონუნც დო წიკვილი შურც- ჩილამური.
- ზღვას, ჭიჭე ჩხომეფც კაბეტი ჩხომეფი ჭკუმუნც. კოჩი კოჩიში ხორცის ვაჭკუმუნც, შურც ეშუღანც ხვალე.
- ჭკვერც ხიოლი უდინჷ დო ბოროს - ნარღი.
- ღვინი ბინეხშე რე მუნაწია, მარა ბინეხის ქალუბე დახუმუანც.
- დუდი ოკო გიჸორდას, მარა შხვას გაჯოგე თიზჷმათ ვარი.
- მოფერაფა შურდინაფილც ხოლო ოჰამჷ.
- ბრელი უჩქუნი თინა კუნტას თქუანც. ჭიჭე უჩქუნი თინა რე რაგადიში გოღურელი.
- შური უქალჷ ბორო ჭკვერო მუგეთონებჷ.
- ბორო დო ხანგაქ წეკინდეს-და, ართი კუნტა თოკი უბაღჷ თინეფიში გარზიებას: ხანგა ოკო ქჷდაკირე! ბოროს მუშო ოკო დოკირუა, მუში დუდი თეშით დოკირილჷ აფუ.
- დიდი კოჩიშა ძღვენი მეუღუნა დო ჭიჭე კოჩიშა - ჭყოლოფა.
- ძღვენც ეშმაკი ეკოჸუნც დო ჭყოლოფას - ღორონთი.
- მისჷთ ამდღარი მარქვალი უსხუნჷ ჭუმენერი ქოთომშანი, თის ვართი ქოთომი აჸვენუ დო ვართი მარქვალი აღვენუ.
- შხვაში ღალატის ღურაშა ვაგიჭყოლიდუანქ, მარა სქანი დუც მუზჷმაშა უღალატინი თინა აკა ვარშჷ.
- მერჩქვანა ჸოროფა რე, გერჩქვანა - ლახალა.
- ქიანას ვენტირედჷნ ფერი კოჩი ღურუქ ოთხი ფიცარც ქენანტირინუ.
- ხემონჭირელი დინდარც დო ღარტაკის ართნერი რინა უღუნა.
- ნარაგადჷ რე: თუნთიქ მუგერუდა, ბაბა დოუძახია. სი დოუძახენი, თინა ქუგაიგონუანცო?
- დუდიში მაწონაფალო ნაქიმინა ჯგირობუა გვალო ჭიჭეთ უჯგუ გლახაში ქიმინუას.
- ჭარაწკუმა ქომოლობა მის გორთუმჷ: ინგირიში გინმანჩურალი კოჩი ჸუდეს, ჭირქა წყარც ქიგეშქვიდე.
- სქანი თოლეფით სქანი დუც დღას ვაძირჷ, გოკო იშენ- იშენი ძირენ-და, სარკეში მანგიორო გურშა ქენიჯინი.
- მუში ულირი რინათ მითინი ვა რე მარდული. არძო რჩინ ართის თქუანც: ახალი ქოპუას დო ასე მიღუნ თი ჭკუა ქომუჩასია. თენა ხოლო ჩილათა რე, დღას ვეჸუაფჷ ართო გეკულა (გაზაფხული) დო დამორჩილი.
- ფარათ რძღელი ვაჭარი მუთუნი კირიბის ვაჭარჷ.
- ფარა მიღუდუნი მოჯგირეფი გჷმაფაფუდჷ. გემეთუ ფარაქ დო მითინც ვა ვორწყექ. მა ხოლო გურც ვეკვაჭუქ ჩქიმ ფარაში მოჯგირეფც.
- ართი ონჯღორექ მაჟირა ონჯღორეს ქიშეხვადჷ დო უწუ: ონჯღორე ვაიჩქუნიავო არგამათ გილურქჷნი.
- ქიმმარჩქვანესია დო ანწი ვაბჯოხონია ონჯღორე, - უგამჷ მაჟჷრაქ.
- კატუქ ინარღუა: კოჩიში იმენდის ქავოსქიდია დო ჸილოში სქუაქ ჭუკიში მაჭოფალო გინიფრთია.
- კოჩქ მაიმუნი ოჭოფჷ დო ღობილც ქიმთახუნუ. რღვინჯება დოუჭყჷ დო ურაგადჷ: ჩქი თქვანდე ქუვორეთია გიშნაულა-და ასე მუშენი ვეიშურცია თქვანდე კოჩი. - ართშა მეფჩირთითჷნი თინა ვამობაღნანიაო. - უგამჷ მაიმუნქ.
- შურიში ზისხირი ჩილამური რე. შურქ დჷგანჭყოლჷ-და ჩილამური დოწენც.
- ჩქინი ტანი შურიში ღართი რე. ჭიი-ჭიეთ იშირუ თე ღართი დო გვალო დიქერქუნი, შური ქიდიტენც ძონძის დო მიდურც ოშურეშა. ჩქინი შურიში ქერქილჷ ღართის დინგარა სქუალეფი, დონთხორჷნა საფულას დო ჟი ქუას ქჷმნოდვანა, მარა ჩქი თი ქუაში თუდო ვა ვორეთ. შური დღას ვემნირღვანც დიხას.
- ტყურა დო მართალი ართი ოფუტეს ოჭოფეს დო ჟირხოლო გოლახეს. გორთილი ვა ვორეთია ოხვილური, - იფირქჷ ტყურაქ. ქჷდარულჷ მართალცჷნი, ქიმიოტყობჷ ტყურაქ, ქიმიოკვათჷ ნინა დო მუში ნინაშა ქიგიჭაბუ. ასე გილურც ხვალე. მინ ტყურას თქუანც, მინ მართალც დო ირ კოჩი უმარდჷ.