სონეტი როკის
Jump to navigation
Jump to search
კირდეს გიმვორექ მერეხელი, ვერეხი როკი,
გოხერჯეკელი, უფურცელე, ბორჯეფსუ ბჭყიშუნქ,
ჭარკინტჷ ბორიეფს იანარიშჷ ნოჸელით ბჭკვიშუნქ,
მივოტე ტყა დო გურგინჷ-ტყვაცშა მალებხიროკი.
შქაბანია სერს გვერშაპიში იჭყაფჷ ზილოკი,
გიმაკიროკუ, ბჯღვალიკანსუ, ბორზალსუ ბჯგვიშუნქ,
გესინთორებუნჷ: ყვარიეფშე ნაბადეფს იფშუნქ,
მაჩილამურუ _ ნტერს ირჷ შარა გეგნუსიროტი.
თაკარია დღას დუდიშჷ უფი მებთხოზჷ ნარჩასუ,
ბნატრულენქ წყურგილს, ვაბსუმარენს ზღოურჷ მეშარე,
ქიმკობდვა თოლსუ _ ეგებჷ სისმარქ მალეხვარჩასუ.
მარა ლურიშჷ ცა მურიცხეფიშჷ ქაცუთ ეფშა რე,
დომზარზალუანს _ თოლონჭესუ მითინჷ ვეშარე,
გესერელიშა ქიანას ყვინგი მიკუკვარჩხასუ.