სესია
სესია! ჩქიმი ჯიმა სესია!
მუ გიჭირცჷნი, სო გაჭუნი,
ქოგიწოლე ჭესია.
მარა თენა გიჩქჷდანი
არძა ტანჯულემცია:
მონა უფლება დო ლუკას
ძალით დეუფლენცია.
სქანო ჯგირი ვააკოდ
დადიასჷ ჭყელცია.
ვართი სქანი მაჭკუმალი
დიდი თავადემცია.
ჟინოსქუა, ვაჭარემც,
ბერემც დო პაპემცია.
სი დორღუმპეს, მარა მუნემქ
საქმე გეიშენწყესია.
ჩხოუცალო ორჭოფეს,
ვიშო გაგმორჩესია.
გერხე, რჭვალუნც, რტყაბარანც
რუს ხემწიფე მხეცია.
რუს ხემწიფე ჯალათი რე,
დუდიშო იწენსია.
სქანი ტანჯვა ვაანარღ
სქან ზისხირით რძღელცია.
მუ გიჭირცჷნი, გაცხადენი,
ნებას ვაგარზენცია.
ოსოგოთე ღვარუენი,
სქანცჷ ვადეჯერცია.
ვადარზოგენც, დორჸვილუნც,
მითინც ვაკითხენცია.
ოშ მილიონ მუშა ხალხის
ცალხეთ იბურთენცია.
აბა ჯიმა, სესია!
მუთ ითვინე თესია?!
ენა ართი გიწიი დო
შხვას გეგონე ბრელცია…
ჭკორ-პატნობაქ მედინუვე,
ტყურა გაღორესია.
სქვამი სიტყვათ მოგრთამეს,
განთხი მერკვათესია.
უჩა უღუ გერდგუდუნი,
ჭითათ დოღაფესია.
ტყვია ქიგუიძინეს დო
კინჩხის ქიგერდგესია.
მის უჯინექ, ჩქიმი ჯიმა!
ვაარწყექო თესია?!
გეითოგორი, გეითონთხორი
ბოროტებაშ ფესვია.
დიხა ირკოჩიში რდუნი,
ვარია ქოთქუესია.
დიხა მუნემქ გიიტეს დო
ერჩხილც ქიგეიტესია.
გაგმორჩეს, სქანი ფასი
კინ სი გაიწოიღესია.
სი აქ ჭკორო ქიდოსქიდი
ნგერეფიში ხესია.
თავისუფლება დო დიხა
ქიიშიი, სესია,
დო უკული სი ქოძირუ
ჩედღას ბედნიერცია.
უკუმელას მულარექი,
ქოძირ სინათლესია.
საუკუნოთ დეეუფლენქ
ედემც მშვენიერცია.
ირ უფლებადინაფილი,
ჸვერე, ჸუნგა სესია.
ოხენდალო აწურექ
მუქთახორაშ ძესია.
ჯგირც ვაჭკუმუ, ვამკგოქუნცუ,
ჸუდე ვაგიღ თე სია.
შქირენ, ჩხურუ დო ლახალა
ირო გაწვალენცია.
დღაშ დო სერით ქომუშენქ,
ქეეჸოთა ხესია.
სი მუშენქ, შხვას მეუღუ,
მუ მერჩანც ხვესია?!
შხვას უხონ, შხვას უხაჩქ,
შხვას ეურღვა ღერცია.
ირო ჭვიტე კილეგანც
სქან მაღაზაშ რჭელცია.
გოკურცხ, ანწი ნუმუ ლურცუ,
ნუმ აშაძუქ ტვერცია.
ღურა უჯგუ, დამიჯერი,
ეცალ სიცოცხლესია.
დუცუ ვაარწყექ, ვარა
ნდემი რექ, სესია.
გოკურცხუდე, სქანი ნტერც
გეუჸოთა ფერცია.
მანგარ კილე გიღუ, მარა
დიხა ვემერჩესია.
დო უფლებადინაფილი,
ჯაჭვით დორკირესია.
სქანი ლუკას სქან ხეთ არზე
ლალა გვანილემცია.
სი ჭკოლა რექ, შულადირი,
დატანჯული სესია.
აბა ჯიმა, სესია!
ვაარწყექო თესია?!
მუშენ არზე მელატურემც
სქანი ნამუშერცია?!
თოლი განჯი, გიკურცხინე,
დეეკვირი თესია.
სი თამამო ქუმწუძახი
ართობაში ნტერცია.
ღორონთქ დიხა ქოდგახვამუ,
ნგერემქ მიდაიღესია.
ნგერემც დიხა სი მიდუღი,
მა გირჩენქჷ თესია.
შეგნება დო სქანი ნძალა
ჭირშე დაგირსხენცია.
ჸოროფა დო ართობას
ქრისტე ქადაგენცია.
ზუგდიდი, 1904