საჸოროფო,
| საჸოროფო by |
| მაკარ ხუბუა. მეგრული ტექსტები. ტფილისი 1937. |
ძვირფასი დო საიმენდო, ირ მინუთიშ გოსაშინე!
ჸოროფაქ ხე ქუმოფთხუ დო გიჩქუდანი ვა მანტინე.
პირად ოკო ქოგიწუათ, შხვაშა მა დღას ვა მანდინე.
უწამალეთ ვა დოპილა, ვარა ცოდა ვა გაღინე.
დღაშით ვიწვალებუქჷ დო სერით ვა რე ჩქიმი რული.
ანთებაქ მა გომირჩქინდუ, დაჩხირს იჭუ̄ ჩქიმი გური.
თიშა ქუგომილუაფუ ჩქიმი ტორონჯ-ჯგურა შური.
ირ წუნს ჩქიმ დუს ურაგადუქ: იშ გოლუა სი დოღური!
სიზუმარო ვა ბრძირინი, მუ ცოდაქ რე გემედიდუ!
თისჷ ვარა ქოფშუდინი, თინა ვარა იმენდი რდუ.
სისუმარო ვორწყექინი, ცხადო გოულუა დუსუ.
ვოხექინი პჭუნს ჸოროფა, გილურქინი გილაპუნსუ.
მუჭო ვორექინ ვა მიჩქუ, ჭლექი გომირჩქინდუ გურსუ.
ფერ მუთუნი დოფსხუნათი, წორო დიფშაყარათინი:
ართი თქვანი მოინალეთ მათ ქემშმოჭარათინი.
საკუთარო ჩქიმი დუდი დროშე ქაშებარათინი.
გვალო გური დომიჸვილუ თქვანი სიტყვეფიშ გოშინაქ.
ჩქიმი თოლენს ქეღირსასო სქანი სახეში გოჯინაქ?
აი მუში მაჯგირა რე, ჩქიმოთ აკა სქან ძირაფა!
მუ დროს სი ვა გორწყექინი, მისხუნჷ რინაშა დინაფა.
ჯიკო ვორექ გინორთელი, ვა რე შურო ჩქიმ მუკორთა!
მუთუნი კოს ვეშულებუ ჩქიმი ელაძიცინაფა.
ღურა ხათეხჷშე ქიმნარტი, პრიველიშე ქორძირინი.
თი დროს მუშენ ვაიღური, მუჟანს მა სი გიჩინინი?
ჩქიმი თოლით მიძირუუქ ჩქიმი მაჸვილარი ჭირი!
სიცოცხლეშე ვიშ გიშებლი, მუჟანს მა სი მიგოჯინი.
თოლქ ჩილამურით ემაფშუ, გური ქალუმონკირინი.
გამა პასუხი მუ ღოლი, ზიტყვა მუთ მუგოშინინი?
ჩქიმი ცოდა გიღუდასჷ, უდროვიეთ დოპილინი.
სქანი გამათ ჩქიმი დუდი ღორონს ქეეშებწირინი.
მუჭო ვორექინ ვა მიჩქუ, სქანი ჸოროფათ ჭვილინი!
აკა ზომა ქეგემიდვი, მუჭო გამოცჷდილინი.
თეზმა ჩქიმი გაწვალება, თეთ ვა გაჸი სი ჯგირინი.
გურს სუსტება ქუდომიჭყუ გიჩქუდანი შხირასინი.
მუ დროშა რე ჩქიმი ბედიქ თაში გილერგინასინი?
შურო ვა ნორცოდუექო, ჩქიმ დუდ დოგიჸვილასინი!
ვარა ცოდა მა ვეპიქო, სქან ჸოროფაქ პილასინი!
ხორციელო ჯოჯოხეთიქ თოლენს მუმეძირასინი.
სქან ჸოროფა თეში პჭოფუნს, მუჭო ღანჯგი რკინასინი.
ჩქიმი ამბეს ქოგიწოლენქ, სქან დუდ ქუმოძირასინი.
ეფერ ამბეს მუგოშინა, შურქ ვა წამირთასინი!
ენა მუს რე მოხვარუნა შორშე მიგოჯინათინი!
სქანი სინთეს აურსული მუსუთ გიგახვილასინი.
ვარა სი მი რე აგირსხენს, ღორონთქ გაგიჭირასინი!
უბედური ბედიში კოჩქ ოკო ვა დებადასინი.
კოჩი ვეშგეცოდებუნო, თაში გილეგარდასჷნი?
გაჭირებულს პატი ქოცი, შარას ქეშერხვადასჷნი.
გაჭირებულ თიშენ ვორექ, სქანი ჸოროფაქ მაშუნი.
ჸოროფაქ გური მეფსოფუ, ტანსჷ ქუდომიქანჩუნი.
ვალიკო ხარბედია. სახარბედიო. 1921