საჸოროფო*

From Wikisource
Jump to navigation Jump to search
please do not remove empty parameters (see the template documentation).
ლერსი მარგალური
by ჯვეში მარგალური პოეზია
მაკარ ხუბუა. მეგრული ტექსტები. ტფილისი 1937.

დუს ვა მჷგოწონუანქ ბრელ ნინაში ტრაბახითი.
ცირეფ ბრელი მიძირუნა -- რუსი, ქორთუ, მარგალითი,
მარა მითინ ვა მიძირუ სქანი ცალი მაგალითი.
ფირუზ-ლალი შეწყორილი, ნაკათეფი მარგალიტი.
ანდამატი ჯგურა ცირა, სო რე ცხოვრენს სქანი ტოლი.
სასწაულო სი გოსქვანს წარ-უჩა დო ოქროშ თოლი.
აბიკტონი, სუბიკტონი, გასამჭვრეტი რექ ბროლიში.
ბჟა დო თუთას აჩაგრენქჷ მანათებელ სი სერიში.
სისქვამე დო ერთი-მორთი, წორეთ ქუნორღვე სქვერიში.
თოლ-წყარამი, ალმასიში აბრეშუმიშ სქანი შუმა.
სქან ჸოროფაქ თეშ დოპილჷ, შურქ მენტჷ, მუჭოთ კუმა.
მუთუნი კილქ ვა მაგორჷ, წორეთ ანდამატი რექ.
ირფელიში უსქვამაში სამოთხეში ვარდი რექ.
მა გოცქვანქ მართალიე, ენა იშენ თაში რექ.
მათ ბრელს ვა გოცქვანქ, საარშიყო ძღაბი რექ.
უნაკლებე მითინ ვარე, სქვამი ცირა, სქანი ჯგურა:
ტანო ჩე ჯა ოსვირინა, პიჯო მესიშ ვარდი ჯგურა.
კისერს სათი გიგობუნი, ქოპუას მა თიჯგურა.
შვენიერო სი მიმოჩქუქ, ოფუჩური ხატი ჯგურა.
მეტი მუორე ქიანას, გაკებუაფუქ ხეს.
მუჟანს ართო იპითინი, ქობძირუნქ კიდირ ჩეს.
ჰამას ქიმგახუტოლუქ სქან პიკვალი ძუძუ ჩხეს.
თენა თაში გათუასჷ ჩეფთხინუა ჭე ფიქრენს.
მარდიანი ვა ჸოფექო? დობღური ლერსიშ ჭარუას,
გუმაშინენ მახიოლე, მინიშა მონგარუანს.
ირო ჯგირო სი პუნდენი, ღორონთი მოჭარუანს.
სქანი-ზუმა ვა მოშქურუ ხენწჷფე დო მაფაშა.
გური ვა მაფჷ მუკორთელი შუმა, ჭკომუა, რძღაფაშა,
ვარა "ქო" დო ვარა "ვარი", გინოჭყვიდი აკაშა.
ღორონქ მუშე მომიჸონჷ თე დღაშ მოჭიშაფაშა?

ძღაბი ჭარუნს ბოშის:

გორწყექ ბოში, ჭარუნქუნი, ნინა ქოგიბირუაფუ.
ზარალ გაფუ, ნინას ტახუ, მელან დოგისქირუაფუ,
მეტი ლერსი ვა გიჭარჷ, თენა დოგიგურუაფუ,
უჩა წარი თოლეფიშა დუდი ქუგოგილუაფჷ.
ჩქიმი ცქვაფა დოგიჭყაფუ, მემიჩქ ვა მიგონენქჷნი!
თის ფიქრენქო, ხასიათი მა სი გამიხწორენქჷნი!
სქან ცალ ქომონჯ მუშოთ მოკო, მა დიდი კოს ვაჸუნუქ.
ქარვასლასჷ იპიქჷ დო თექნე გიმეფხანტურუქ.
გასაკვირი მუჭო ვარე, ხანგურ სიტყვენს ვა ფულუნქ!
მა, სი თენა ქიშქიდენი, ჯაბის მუჭო ვა ბღურუქ?
ჸვერე რექო, ვა არწყექო, ქიგმოდინუ მა ჯგირეფქი.
სქანი ტოლი ვა ძირიო ჩქიმი გარდა შხვა ცირეფი?
მა ჯარიშა მიშებლენი, ბრელი პუნს მაჯინეფი.
გჷრჷნს ძია მუშოთ ოკო კისერს გიობუდასჷნ?
თუნთის სხაპუა ვა დაშვენს, ბიწკის გიორთუდასჷნი,
ი სათიქ ვა გოგითანდჷ, მა სქან კიდირს ბლურდასჷნი.

მაშო ჩიქვანი