სამარგალო.
Jump to navigation
Jump to search
სიქვამეთჷ ცქვაფილი რე
სამარგალოშ არძა მხარე,
მა თაშ მიმოჩქ, სოდგა ვებდენ
უჯგუში ადგილ სოთინ ვარე.
მა მიჸორსჷ სამარგალო
სოდე დებაბდი დო იბრდი,
ჭიჭე ჯოხო სამარგალოს,
მარა მისხუნ ფთქუე დიდი.
დიდჲ ვარდასჷნ, სო დინტირე
ჸოროფაში ებშა გური,
საართოთჷ არძა ირთუ
ძიცა, ლაჸაფი, ჩილამური.
კოც ვაუთქუალუნ ფერი
მა მუთუნი ვამაჭარე,
ირ კოც ქორთხინთ დობთხილუათ
საჸოროფო ჩქინი მხარე.
ოჭმარესი თოლს ჭკირუნსი
ბჟაშ ჩხორიეფჲ ბარჩხალია,
ალმარჩქილე ჰამო ხონარჲ,
სქვამას იბირს მაფშალია.
სოდგა ადგილს ვეპუენი
ჩქიმ ქიანას მოკო რინა,
ვაგამდღანათ გოლვაფირო
მიჸორსჷ დო მუ ფქიმინა.