რინა მუშო მოკო დო
Jump to navigation
Jump to search
რინა მუშო მოკო დო
რინას მუშო ვოკოქუ.
ზალამეფიშ წყურგილეს
გომტირხ ეფშა ორკოლქუ.
დღალეფც ოკო სხუნუა,
ფურშე გიშასორტუა.
შური ხვალე მივაშქვი,
ჩქიმშახ მის უჩქ სო რდუა?!
ქობალც მუკმოპტახუნქ დო
ჩილამურით ვორტუა.
მუჭო არძაქ გისოფუ
ართ ჰალამო ჸვაშ ძაფი.
კუჩხის განშე გითმომღანც
თე ქიანაშ ძანძაფი,
მარა მუთას მომიღანც
თაქ უმოღე ღეჟელი,
მინ სქირონა დოფხვადუ,
მინ ლოფო დო ლეჟერი.
ბჟა ჩხორიას მობეჭუნც,
სუნჯ მირულე დოლოშა.
ამდღა ჩქიმ დუც ინვორექ,
ჭუმან იპიქ ხოლო შხვა.
ჩხომც მუნაფას მებგორუ,
წყარპიც იბჭყა ჯინუას.
ცა რდას ირო მაფალუ,
დიხა ათირჩინუას.