რინა ბედიშ ნდურია
თე ცხოვრება მუ რე, ჯგირო ქიდიბგურე.
ბრელიშ რჩქინა მოკოდუ დო ირფელ გეგნოფშურე,
მოკო, რახანს დებაბდინი, ჭახანს ვადობღურე,
ჩქიმი კულა, ქვინჯი რწულა, ჯინჯშა გეშაბქურე.
ფიფრქე ამდღა, ფიფრქე ჭუმე, ტვინი გეგნუოფურე,
კოჩიშ თეზმა წვალებასჷ ღორონთ მუშენ ჸურე,
ვაგებხარ-და, თე ქანაშა მუშა მომიტყურე?
ოკო წკირიშ წუმნაბადი, წკირსჷ წუმობღურე,
ჭიეჭიეთ პილუნქ ვარი, ართათ გამკომსურე.
ტყურას გირაგადუქუ-და, აბა თენა მურე -
შხვაშო შაშეფ დოლუ, ჩქიმო - იაქე დო დუ რე,
შხვაშ თუ ღეჯო ქიგნირთუ დო ჩქიმ თუ ირო თუ რე,
ლაიტის ქინუოთასანქჷნი, გეურსუ დო რწუ რე,
მუზმა ჩიჩიე ქიკოჩებუნ, ჩქიმ ბედ ფერი მუ რე?
ხვალე ჩქიმო იმართლებუ კუშ სკუა კუ რე!
გილაფრთი დო გილაბდირხე, ღეჯიცალო მნდღურე,
ვართ კოჩ მიგენს, ვართ ღორონთი, ვით ზღვა გეგნომნჩურე.
სირჩინუექ ქათმოჭიშუ, ანწ მუ დუმაგურე.
მუმეძულუ ქიანაქჷ, ტყვია ქეგიფწურე.
ცოდაცალ ნარდ ვორექ დო ცოდათ ოკო ბღურე!