ჟირ წანაშ უკახლე
ჟირ წანაშ კინოხ ნაჸიდერ ჯინსი მუმოძჷ
დო ბოტასეფი ამარ დახე ართ წანერი.
ჯემპრი მუკმოქუნსინ სტუდენტობაშ ბორჯის
იპიდი თინა, თაშნე შირილიე ასენ.
შური დო გური ვაბშირუ ხვალე...
ჭვენს დო გინაქუნალ ვა მიღჷ,
ჭვენს დო ჩქიჩქუცალო გილურქ უგინოქვენჯეთ...
მა ირ დღას კათაწკუმა მიხვადუ მეულა-მოულა,
მოკვირუნა თინეფ კილ-კილშა დო
დუდშე არდებულო მიჯინენა
ჩქიმ მიკაქუნალეფიშ გინაწონს.
მინ ჟიშეშე მიჯინე, უნჩალაშ გეგაფილს
ოხიოლ ჩქიმდა ორცაშე ჯინა...
მა კომპლექსეფით ეთმივფშაფუქ,
ჩიება ჯგირშა ვეგშმაჸათანს დო კინმიბკინანქ,
დუდშე ხომ ვამიჩქ მუშა რე საქვარინ...
უკულ მითმეფხვადუქ დო
რახან ახალ ბარგიშ ოჸიდე ვამაპალუნ
აწმიბრინუანქ თოლშა ითამუ
"არმანიშ" ჯინსეფი დო "ლაკოსტეშ" მადვალარეფ მუმოძჷ,
"ბოსიშ" გინოქვენჯი გინმოქუნს დო
"ტომი ჰილფიგერიშ" ჯემპრი მუკმოქუნს...
ჭე ხანშა ჩქიმ თოლწოხლე ირფელ ითირუ,
მერინა ჩქიმი ხონარკვათირი რე დო უმოს არგამა.
ჩქიმ ხეს რენა ასე თე კლიენტეფ ხოლო...
მა იმობრძგვენქ დო ფირმაშ დოკვათუეფ ირდუ,
ირდუ თინერო ჩქიმ მუშნალ ხოლო ნამდა
ჩქიმ თოლშა აწნარინეფ ბარგეფ
დასურო მაჸიდირე მიპკორინუენ...
თენერი რე თელარა დო
თენერიე ვიზუალიზაციაშ ნძალა,
თენერი რე კათა მინშა, მერკე შურიშ
დო გალენ სისქვამაშა მიმაჯინე...
სით გედირთე ოკო დო
გაღათ შუე ოკო სქან ნასხუნეფ რინა,
ითამ დადსქან ეკოხედას ყებურს
დო თათმანეფს გიშუნდას საზოთოს...