პაპაშ ლერსი
| პაპაშ ლერსი by |
| მაკარ ხუბუა. მეგრული ტექსტები. ტფილისი 1937. |
ხენწჷფეს ჸუნდუ აგენტეფი ჩქჷნი მამონებელო.
მინ ორდჷ-და, პაპეფი რდჷ ოხერ-წასაგებელო.
პაპეფი რდჷ, მაჸალეფი, ჩქჷნი მაღორებელო.
მუდიგა გლახა მიწისკონ, ორდჷ მაკეთებელო.
-- აშო, ბაბა, აშო სქუა! -- პაპეფ მირაგადუდეს.
ღორონს ეხვეწითია დო, თის მიქადაგუდეს.
ჯგირი დო სქვამს თის ვარზენდით, ჯუნა პაპეფიში ხეს.
ოხვამეშა მორთია დო ზარენს უხაკუანდეს.
ირი ჟეშხას, უქმი დღას, ოხვამეს წირუა(რ)დჷ.
თექი დიფშაყარჷდით გალობა დო ბირუათ.
ლეტაშ მოწიკვილი ყაზაყი ხეს გეუფინიანდჷ.
პიჯვარს მითი ვე წერდჷნი, ჭოფუა დო ხვილუა რდჷ.
პაპა გერდჷ წირუას, ხალხიქ ოკო ურჩქილჷკონ.
მამაო ჩვენო, რომელი ხარ ცათა შინა, წმინდა იყოს...
სპასი გოსპოდი ლჲუდი ტვაია, ნაში ალექსანდრე, ნიკო.
ბირგულს ქჷდაშქვანდესჷ დო, ხარხი გინირთუდჷ ჯიკო.
სოლე დამამონესჷკონ, პაპაეფი თის გოპუნდეს.
ხვამა-წირუა პაპეფიში, ჩქჷ მუსჷ დჷ მორგუდეს?
კოჩი მუჟამს დოღურუდუნი, ართიანი მოჸუნდეს.
შქა ტაბაკის ხედესჷ დო, საკურთხი გოუსორგუდეს.
ქჷდეელახჷ ყაზაყიქ, მიდართეს პაპაშა.
ოკო დაზიარჷკონი, შურიშ აშალაფაშა.
თი ყაზაყიშ ოჸვილარო, პაპას მეუღუდჷ ლაბაშა.
ქონებას დაკითხედჷ ზიარობაში ჩამაშა.
დოღურჷ საწყალი ყაზაყიქ, გინოუჭყვიდეს გარა.
პაპენქ იშენი ქჷმორთეს, წირსფალი ღარიბი რე მარა.
-- ჟირი ჩხოუ მუჩითია, ვარდა ოში მანათ ფარა!
წესის შურო ვო უგენთია, ხელათ მუჩანთი-და ვარა! --
ათაშინე ვაფუდით პაპენს ათომონაფილი.
ამუდღა სარკილი რე, მარა ჯვეშო ორდჷ მუნაფილი.
ტარას ჯაბუა