პაგანინიში ჩილამურეფი
1. რონდოში სონეტი
მუ იჸიდუა უძაფეთი მეიგამუდკოვა
სტრადივარიუს, ექ დოხუა ი ვიოლინო,
მარჩქილექია კინ ბოლოშა იგოიმუა,
ართ ჸოფენია კურცხე რდუკო, გოკონ ლურდკოვა.
მუ იჸიდუა ჭე ადრეშე ჸუჩა იდკოვა,
ურჩქილექია დო მუთუნქი ვაგგაგინუა,
უკულ თქუევა: მოკონ თიქი ვემგაგინუა
დო მოგორევა, უჯგუდუა გილინუდკოვა.
ე ი სქვამ ცირა, მიშ ჸოროფათ თენა იჭუნი,
ემერ მუკოხე, ემერ სოდე ელაკუჭუნი,
თიზმა კათა რე, კოჩიშ ვეში დანტირუ ართი,
ჸელენანანდო მუჭო უწინქ ანწ ვამორთავა,
გედირთ ი ცირაქ დო ქაჸათუ ჸვინთელი ვარდი,
- მანგარ რექია, მიდაფრთია, ჯგირო ქორდავა.
2. IMPAR CONGRESSUS ACHILLI
ქორთხინქიავა ჩქიმ პატონი თე გოციგანი
ვაგოკონია, ათაშ მუშენი ამირდითია,
დიღვარუ ართიქ: შორ შარაშე ჩქი მოფრთითია,
ვარჩქილენანდა, - (თქუ ნიკოლოქ), ჸუჩა იდანი.
ჯას ხირცქანია დუდ, მა მოკო ფარა იგანი
მადვალარეფიშ ჸოთამას მა გოძირანთია,
ჩქიმ მეგამაშა ვაგარჩქილეს დო ინგართია,
მონეფ რეთია, ჩიჩიე დო შურით წინდამი.
თოლეფწკურილო მიოგანდუ თეს პაგანინი,
კათა ინგარდუ, მინ სხაპუნდუ დო იძიცანდუ,
ბრელს ქაწასერუ თოლიშ წოხლე, მინს ქაწათანდუ,
ულა ვაკონა (ვართ უჩქუნა სო იდანინი).
მაესტროქ დუძახ: მა გიჸორთო თუ რჯოგუთია?
ართიქ გესხაპ დო თქუ დემეთხი, წიე, მეუა!
3. მაზაკვალი
ჩხოულეფ რეთია, მეტი მუჭო გეჩუათია,
....ჷჷჷმბეე! ...ჷჷჷმმმ! - ართიანს თაშ უძახუთია,
გურით დო ნინათ გვალო სარკოს ქოთქუანთია,
ბოლო კაპეკის ირო კურთას იჩუანთია.
....ჸჸ..! ...ჸჸჸჸ! - ვა, გირაგადუთ ღეჯეფ რეთია
გიჸორდნანია ეთი შური, ათნა რეთია,
შხვანერო აბა მეტი მუჭო გიწუათია,
- დო გეცუ კათაქ, ბოლო-ბოლო მი ჸოფექია.
მეუა თავრე! - ქიდიჭყ არძაქ ართო ჸელენი,
კუჩხმადვალარეფ გემინწყეს დო დუჭყეს ჸოთამა,
გრაფინიემქი, ვიკონტამქი ოდო პერემქი.
მუს ჯოხონია ე გოძიცაშ თაშ გოჸოთამა,
სი მაზაკვალი, ათავრეშე დიწიმინდია,
ვაგაჩენდიდა რაგად ვაკო დორჸვილუნთია.
4. ***
,,,ჷჷჷჷ! ჷჷჷჷ! ჷჷჷჷ ღღღ-რეთია ნჯილეფი,
ქიდიჭყ ნიკოლოქ, ქორთხინთია გაჩენდათია,
ქომრჩქილითია, გვალო შხვანერს გიწოლენთია,
ჸაუუუ! აუუუ! - გირაგადუთ, რეთია ნგერეფი.
იფციგანია, ვარეთია თელო ღურელეფი,
მუ ჯგირ რეთია, გიჩქდანია, მუ ჯგირ რეთია,
ჭკვერეფ რეთია, ჭკუათ გოფშა მანგარ რეთია,
დო სისქვამევა უთქვანეთი რენია ჸვერე.
ბრავო ნიკოლო! - გეცუ კათაქ, მინჯე რექ ჩქინი,
ღორონთ რექია ჰარმონიაშ, თოლ გომწყითია,
ჸჷჷჷჷჷჷჷ, თიმწკუმა გირძე ნოტიქ დიჭყუ კიჟინი,
ართ ძაფ რკიანდუ, - იხვეწებდეს გაჩერითია.
ორღვეს ვარდეფი, ქუდი, ჩაფლა, დიჭყეს კანკალი,
- იბხვამანთია ანწი სკანო სი მაზაკვალი.