ოჰ, მამანტი, მამანტი!
| ოჰ, მამანტი, მამანტი! by |
| მამანტი კვირტია. "კვიმატი" 2001 წ.ხ 43-44. |
რაგადანს შური ქჷნორდგენი, ჰა გიჯღონა ბარათის,
ხოლო ბრელც ეჯგუას, გიჩქჷდას ვართი ართის,
ეშენი მუჭო გოწყინუა, ვართ გოგიტახ ხათრის,
მიჩქ თეცალი საქციელით, ქინვანთხუქუ სქანი მარდის
გოღა თოლსერ ქჷგებგონი, შური ნოდგვე მამანტის,
ხობწყარ პიც გოლნოჸვე დო ნოთხორუე თექი ბატის,
ეკლესიას ქიგეგაფუ ნოხვეწყუე ჯვეში ხატის
თეში დორჩინე ქოგჷნია, თურმე გირინიში კვარტის.
მორო იშენი ბთქუათჷნი, დღას ვარდ ინა კოჩი,
ზუგიდ რდჷნი, იჯინედ მუჭოთ ოჩი,
ოსურენც ქოძირჷნდჷნი, გორიჟონიდჷდ ოჩო კოჩი,
ბრელიშა სერით გუსოფუაფუ მინაკიშა კაბაში ფოჩვი.
ამდღა სოდგარენი ტყას მითორე, მოკვაკვილო ცოდაში სქუა,
ჭკვერი ინა დღასჷთ ვარდ, დღას ვეკითხირედჷ ჭკუა,
ირო ახარკალჷდჷ დო ქოთ უღუდუ დუდიში ჭუა,
ის დღას ვეიშუგორ ოსური დო ჸვერე ჯუა.
აკა ქუმოძირაჷნი ინტერესი ძალამც მიღუ
ალბათ გომანილი ორე ჰიტლერულო ჯვეში კიღუ
მუჭოთ მიწუ რედაქტორქჷნი, კინ თიცალი ორე ძიღუ
ის იშენით ვამორთუმუ, ზუგიც მუთ ქობალი ტიღუ.
სამამულო ჩხუპიში დროს, გვალო ცოდას ქოგურაფუ,
თურმე თურქიში მოლაცალო ფრიმული ხოლო დოუღაფუ,
ლემენცემც ბჭყვინდუნქია, ჩილიწკუმა დოგიცქვაფუ,
ოშქურანჯი საქმეწკუმა ხვიმურაშა ქოუსხაპუ.
ორდენიში ღირსებას, მითინი ქიმერჩანდასჷნი,
ართის ვარი ჟირც მერჩა ინა ორტვინც ჩანდასჷნი.
მარა ორდენს თის არზენა, მიქჷთ იმორძგვ ხანდასჷნი,
ჰიტლერელეფი მიკაჭყვიდი სამშობლოსი დაცვასჷნი.
მართალც კოჩი გიწინცჷნი, ენა მამანტი ნჷმ გოწყინ,
ქოგიჩქ ალეს უჸორდჷნი სიტყვა მართალი დო თინ,
კოჩური საქმეს სი ვართჷქ, გეტყვებ ვარექჷნი თინ,
ბიგა ქალაიბიჯუაფუ, ხობწყარი პიც მილარშვინ.
მეტი ბჭარე ვაღირჷქ, ჩქიმი მოკითხა თაში ორე,
შარას თათუშაქ ქორძირას თიშა მიჩქ მა ონჯღორე,
თათუშა ხომ ცენზორი რე დო მა ხვალე თეს ბთხულე
თე წერილი გოუტუას, ამხანაგი მიიბგორე.
მისამართის მთხულენქჷდა, ათენა რე ჩქიმი ხვალე
ზუგიდი მრეწველობა, თირქია რე თექი ალე
ათეს მუჟამც წეკითხენქი, სქანობურათ ქოგიხვალე
სორდიეფიში უჩა ვირი, დორჭიპი დო ქეკუნქვალე!!!
1944 წ.