ოხორხალი მაშინა
გოთანაშა დიო ჭე ქოძჷ,
ვარე შურო სისანდობა,
ხვალე ინგჷრი მიხუმინჷ
დო რე თიში ხონარობა.
ოხორხალი მაშინაში
ოზეს სინთე ქინიკარკანტ.
მაშინაში საკუმოს
უჩა ფურკი ქიმიკვარკვანტ.
სინთე ელექტრონიში რე,
ძალა უღუ ინგჷრიში,
ფურკი მურცი ქვაბიშე რე,
აკნარძემი ყარულიში.
დიო კათა ლურენჯით რე,
მუმურცჷთი ვაუჸიუ.
მარა მაშინაქ გოღვარუ
დო ირფელი გაკურცხინუ.
მუშეფიში ონჯირუშა
მინიბლინი, ქისოფუნა
ზორც გამწოჸუნაფუნა
დო ქჷდიჭყეს მუკოქუნა.
ჭიჭე ხანქ მუკილჷნი,
ორშვინალქ გოწჷრწინ,
მუშენქ ქჷდიჭყეს კათუა,
ქვაბიქ ფუშაფის მოუძინ.
მუჭო არძაქ დიკათჷნი,
ზორქ მანგარო ქიმიოღჷრღინ,
მუშენქ ქიდიჭყეს ფაცური,
დიდი ხორხითი ქიბურინ.
მემაშინეს გოუტებუ
მაშინა დო ქირსიალჷ,
ღვედი ქჷგოთხოზ ბარბალენც,
ომაღურეთ ქირგიალჷ.
მედიშქეს ქჷმუღალ
დიშქეფი დო ქოწკორჷნც,
ქვაბის წყარი ქიმეჩეს,
ჩხოუშორო ქოღუზუნც.
კაჩიგარც ტოპკა გუნჯამუ,
ჭითა ალი ქიმთივარვალ,
ქვაბის დიშქას მითარღვანც,
სინჩხეშე სახე ასარკალ.
კოზლაშე ჯა გეგლარგინეს,
ვაგონეტკა ქიმურინეს,
ეკუჯიკეს დო ქარგინეს,
ხორხიშა დუდი ქიმუდვეს.
რკინაში კანცხუ გეჭოფეს
შხუ თოკის მოსქუაფილი,
ლომით ჯას ქიმიაშქვეს
ჭახნაკის მებუნაფილი.
მაშინა ფუშანც, ირგიალ,
ხორხი დაზგას აშებურინ,
ჯა ქიმეჩეს, გემშეხჷრიწ,
დიფულუ დო აშეღჷრღინ.
მახორხალი ჯას აწორენც,
ოკვირ მანგო ირო თის,
თოკის ზინდჷნც დო ურთანც
მეჭახნაკე ჭახნაკის.
რეგულიატორქ ორგია
გაკეთჷ დო ქიგლებურინ,
ჭიჭე ხორხითი მუში დაზგას
ომაღურეთ ქაშეჭურჭინ.
დიდი ხორხიში ხასლას
მუშობურათ გეწჷრწინჷნც.
მუკურე მუში სპეცეფი,
მახორხალი ჯას უთინჷნც.
მენახორხე მუშენცჷთი
კალათეფი ქუკებუნი,
ფიცარეფიშ მაღალარენც
ფიცარეფი ქიმუღუნა.
ათენერო არძა მუშა
მუშუში საქვარც მუკურე,
ართიანც მეჸუნა დო
ირჩქილენა საქმეჸურე.
მაშინა დო მუშა ხეშე
მურც ირფელი გჷშანწყილო
დო ქოთ მუშეფი ირდიხას
ქოჸოფედან გომორძგვილო!