ოსეოფა
ნუმ გირსხიმანს თოლეფ შხვაშა;
ოსეოფა ბორჯი რენ დო
მურიცხეფიშ კოროცხუა
ვაიშინერსჷ თუთაშხაშა.
დიხა სოთინ ვეგენტებუ-
ნაცოდილა, ნაგვაგვალა,
გჷგაკილოთ, გჷგალუაფ,
მარდიშ გინონქირაფაშა,
დემონკ თესხე ცოდათ, ვარა
დუცუ ქიმკიბუნუანდჷ
მუშ მახალიშ ჩე თუმაშა.
ნუმ გირსხიმანს თოლეფ შხვაშა;
აშ მიკირთი შურ მალაფშა,
ილორც იხვამ ჯვეშობურო
გიჸორდინი თი ხონარშა,
ეგებ ღურუს გუვოჭყორდე
სქანჲ კიდირ დო ჩხეშაშ ხათრშა.
გურს გურითჷ ქუმუფერე,
იბჟუმინათ ბჟალარაშა,
დღა დო სერი ეკანთხუნი,
დიმერეხუ, დიპანჯუნი,
გებჸალებუქჷ უსქანეთ დო,
მიდებგურგინუქჷ ცაშა.
ვეკმოჭყუა, ვეკმოთვალა,
ნიშან ვენშომირღვა ზღვაშა,
ხატიშ გითანჯირაფალი
გოფუშკუტელ მოჭყუდცალო,
ვეგნომზგირტა, ვამღამანკა.
ნუმ გირსხიმანს თოლეფჲ შხვაშა;
წკონდას ქენმოჯინი ართშა,
ლანდღვირ თოლეფიშჲ ნერჩის,
წკვერემი დო დაჩხირ შქასჷ
ჭერჭეთ ეკოზგუმონჯილი
გვერეფჲ მუჭო გიგვარგვასნა...
დო შურ მონთხუ ანგელოზიშ,
მეჩიებუ ჩქიმ ნინაშა,
ეჰე! ჯვარცჷ ქეგმოჸონეს,
იბაბდებუქ მაჟირაშა,
სქან ჩილამურ ნორცხვაცალო
შურცჷ ენმაბარჩხალუნი,
თინა მისხუნ ჩხონაფაშა.
ნუმ გირსხიმანს თოლეფ შხვაშა;
აშო მიკირთ შურმალაფშა,
ეგებ ღურუს გუვოჭყორდე
სქანჲ კჷდჷრ დო ჩხეშაშ ხათრშა.