ორთაში ზარალი

From Wikisource
Jump to navigation Jump to search
please do not remove empty parameters (see the template documentation).

by გიორგი სიჭინავა

ორთაში ზარალი



მუ გოჭირ, მარგალი,
სი გუგულიშ მარქვალი,
დუდიშ მაღორებელი
მიწკჷმა რექ მართალი.

გამგონებ, ზოთონც
დღალეფჲ ურსხებ მარტის,
მი მეჩანც მარდის,
შხვაშ ოგვაჯეს ნარდის.

     * * *
ირფელც მუში ოჩი გეძჷ,
ირფელ მუშის გაფულენც
ბორჯიშ ელასირელ ხამ
იმენდეფც ცაფულანც.

წყარეფ ვეგიხუნუანც
ხვამარდეფიშ ნაულას,
კოჩიშ თოლი ვაძირჷნც
ღორონთიშ ნაფულას.

დოთჷნცჷ დო დოჭვენცჷნი,
ცა გოსარკჷნც მუნაფილი
დო ბჟაცალო გამწოდირთ
შურ, ჸოროფათ ფუნაფილი.

კინე დირთუ აფუნი დო
გეითოფალუანც ხუმაფილი...
სი ღორონთიშ ნაჭყოლოფა
შხვაშა გაფუ თხუაფილი.

მუ ოკოდ სქან მარქვალც
ტურტურუაშ ოგვაჯეს,
ინეფქ შხვადო მირდესჷ დო
ფსუა შხვადო გოფაჩეს.

აკა აშო მიკირთი დო
გონწყი გური, წყუნაფილი,
ცოდა იზმა მონკა ვარე
ჩილამურით რტუაფილი.

ნართეფქ გურც დიხვილჷდა
ნტერიში ჯინშენ იბირით,
დო სი ხოლო ონირზუდი
ათე რინას, კიდირით.

უკულ ოჭიშ ქურთინე დო
ვამიჩქ, მი მუს თქუანცჷნი,
მუშ მაქექა ჸოფე შარა
მასქური გიჯიკუანცჷნი.

თუდო დოლო, სქანიცალო,
დუც სიჭიჭათ იჩუანც,
მარა ირ კოჩი, მით ქორენი,
კუჩხის გიობიჯგუანც.

ნგერი მუთუნ ნგერი ვარე
ომანეშა ინტებუნი,
დუდ გაფუ ონგარალი,
მითინ ვაგენირზებუნი.

        * * *
აკაბურცხა სამარგალო,
აკა, ბუცუცუნია,
რაგადანა ლეხი რე დო,
მალას დოღურუნია.
ათეზჷმა გაჭირებას
თინა ვაგურზუნია...
ლეხ ვაბადენც სქუალეფც,
ლეხის უცენც მუნტურეფ,
უმინჯურო მეტებული,
ქომწი შურო მუთუ რექ.
სო დარღვი დო სოლე მარღვი
ათეზჷმა უთურეფი...
ქორჭკუმუნა სქან ტანიშე
გიშნაულა მუნტურეფი.

      * * *
გუგულეფი გურღვინჯებ,
ართ დღას, მუნაფილც,
ათე ჩქიმ ჸავავაში
რაგადი დო ჸურაფის.
მაჩინეს: ,,მარგალიში
მანგი ვარე გუგული,
ინა დუც ქიჩინენც
ჭიჭეს მირდუნ უკული.“

      * * *
მართალი რე დო მუ უწუა,
ქიმუჩინა ბოდიშის,
ნარღი გურც, ოღურალო,
მიძგვიტუანს ოდგიშის.

ორთაში ზარალი ვორექ დო
ცოდა მუნობძ ოჭიშის...
გუგულეფიშ ჭკუა ვაძ
ამდღანერი ოდიშის.