ონჯუა
Jump to navigation
Jump to search
ონჯუა რე სარკილი დო
ბჟა ალალჷს გერინელი,
იქაქალჷ რგილჲ ბორია,
ორთაძალაშ გორჩქინელი.
ხობწყარი პიც, გვალაშ თუდო,
გევოხექჷ დიდი ქუას;
დუდი ხეშა გილამიძჷ
დო უჯინექ წყარიშ ულას.
წყარი ტკილენც გინმობურსუნც,
გინმიჭუმინ გინალაფუს,
ქუას წყარჩიტი გეწიანც,
წყარი ტობას ინემაფუნც.
მოლე ოროს ქიგლურინ დო
მელე ზესქვი ქიმკიფაჩალ,
რგილი მასქურქ ქჷდირქიუ,
წვანე დელო ქიგიქვაჩალ.
ჯაში ფურცელენც მასქური
სქვამას ქუფარფალუანც
დო ფურცელენც გეჸონილი
კოლენც ქაჭჷრჭინუანც.
ბჟაქ ალელ დო გელერუმ
რობა აკანქ ორუეფით,
მარა ცაქჷ გიჭვაჭუტუ
სქვამი, ჭითა მურუცხეფით.
ვამკურთჷმუ ბრელი ხანც დო
თუთაქ ხოლო გელესარკალ
დო თიშ სქვამი ჩხორიაქჷ
ტყას ვარჩხილი ქიმშაკანკალ.
მა ორთაში სისქვამესჷ
გვალო ქაბობრებუდი,
წიგნი ქჷდომიდვალჷ დო
თუთას ქაბჩემებუდი.