ნიტე ქომჩასჷ თე ფულირი ამბეში რჩქინა!
მიქჷ გიოდვუ თე უარზო სპექტაკლის რინა?
კოჩიშ გამნარყჲ მუშენ დარღვუ ოღარღინალო?
ნიტე ქომჩასჷ თე ფულირი ამბეში რჩქინა -
მიქ დჷმაბადჷ, ჩქიმ ცოდასჩჷ მიქჷ ინალჷ?
მუშა მაწვალჷ, მუს გჷმორზჷ ფურე ჩხორია,
ბჟაშ სიტჷბასჷ მუსხანც ვორდა მექუქინელი?
გურჲ მირაგადჷ - დუც მუდაშა გოუნჭყორია,
რინა დო ვარი? - ჰამლეტჲ რექო, ჯაბით რჯგინელი!..
მუშო ვოკოდით, მა დო ვარა კოჩიშ გორჩქენჯი,
სიზიფეშ ქუაშჲ უგაღეთჷ გილმანთირალი!..
კოჩის ვაუღუ დიდ ნძალი დო ძალამ მორქენჯი,
იშენით ვარე წკურუნტიას დჷმანტირალი.
მათჷ სოთინი ვემტირექჷ, მუთუნ ბორჯისჷ
ვაჸოფე ჩქიმი ლექჷნი დო შურიშ მოსვანჯა...
ქაფსქილადჷქჷ ოქიანეშ რგილ დამორჩილსჷ
აგაგურჲ რინა, ჭყელი რინა, მიქ მომისაჯჷ?
შურ ინმახაკჷნ, იბღირკოლჷქ ღვენწკიშ მაგურო,
თოჭუ ვორექ, ჸუნგა ხოლო, ცაშ ვამარჩქილე!..
მაქიმინალიშ ნაზუკოლაქ მა ვადმაგურუ
ვართ ჟიშე მულირ ტიბ ზიტყვაშა გურქ ვამაჩინჷ.
მეპუნქ ჯიშთურო ჩქიმ გაღაში ნაზუკოლასჷ,
მორძგვი დო კვარჩხი ართ მაფუდუ არძა რინასჷ,
ქჷვაჭარუდე მოსვანჯას დო თელო ულასჷ,
მის ვეძნახებუქ ეტებასჷ დო კინ ედგინასჷ!..
სოდგა ქიმკომტე, ფუფქჲ ვორდა დო გოკონ ჭვათირი,
ჯუმაშ გორჩქინელც შურიშხასჷ შურჲ მეშორებუ.
ჩქიმჷ არშობასჷ კოსმოსიში მითოჸვანთინი
ირიათონიშ დალებაშა ირო ონებუ...
მესიში 21, 2018 წანა, ქუთეში