ნარტი
(ჩქიმი ჯიმა ბონდოს)
ზენიშ დიხას უფერუანქ, მიჩქუ,
ოქუმიშ ცა დუდშა გისხუნ, ჯიმა,
ჯვეშობური ქიქაქალნო სიორჲ
ცხაცხუშ ჯინჯის, სუკის, – ეკალწკჷმა?
დიდა – დიხას შურ ქუნთხანსო ხვითოშ,
ქოშოლუნსო ცუნდჲ ლაიტიშ სუას,
ქახვარუნო შურო მუთუნს იმენდჲ,
ამარ, გოღა გინოღალირჲ ჭუას?
ბჟაშ ილულას ქისარკუნო სქვამას,
ზღვაშ ზოლიშ ჟი ცაშ ფონ ძოწიშ ფერით?
ურჩქილექინ, წყარიშ ხუმა, ალბათ,
ოშნერ ფირქემს მუშკოჸოთანს სერით.
ანარაშ დუდს ქორწკინჷნსო ვარჩხილჲ,
ჩე მუნაფა ქიგნოჸუნსო გვალას?
ხვიჩალჲ თოლეფჲ გოუჯუნი ალონს დო
გვალო შხვა დღა გოთანდუნშო მალას!
სი გიჩქ, ჯიმა თე ართ ტკოუ დიხას,
მუშ მადიდა ჸოროფა რე ტყობუნჷ,
დადიანიშ ბაღიშ ჩიტჲ დო ვარდა,
ოქუმ-წყარიშ კალმახჲ ნეტე, ქოპუნ!
ილორიშ კარს სანთელს დობჭუნთ მალას
ილორიშ ჯვარქ ქიკორინ-და შურო,
ბირა-ბირათ გათანუანს სერეფს,
მაფშალია ანწით ჯვეშობურო.