მუჭო ფჭარუნქ ლერსის
ირ ბჟალარა დღა, ლერსიშ ჭარუაშ პოტენციურ ბორჯი რე, ირ მუნაფილ დღა, გიმნარკებუშ მოხ, კრიზისიშ. გელაბჟათუნს დო გურშა თოფურცალო ინმომიწენს ჰამო ჩხორიეფი, გოჸინილ, გოსქანჩილ გურიშ ირ ჯერღვის ჸინუს განდღულუანს, გატიბუანს ირ აკანს, გაფურუანს...
დო ეჸ, ეთიმწკუმა დიჭყაფუ ზიტყვეფიშ ლაჸაფი ხოლო ჩქიმ გაღას. ეთმოცენა წყურგილიშ ქვიშაშორო ზიტყვეფი, ეთმოფუნა, იღვერღუნა... თე ეცუმილ ზიტყვეფშე არძა სინთელუან ვა რე, მუშო ოკო რაგადი, მარა თარი რე თინეფშე ართიქ, გურიშ ჸურე ინტას და შქაბანიას ქინმაციკას, მუჭოთ კოჩიშ თასი მინჭუაფუ შურშურაიათ სასქუოშან თეშ დო უკულ მილიონშე ართი მოხვადუ მუშ აბანსინ თეშ დო ხათე ლერსიშ ზადუა დიჭყაფუ. გილაფუფშანქ, სვანჯი მიდინუ, გილებრთანქ დო გილეფსოფუქ, სონდარო ართი ლერსი ვა დირსხუაფუნ. გიმიბჯინექ ოსინთეშე, თოლს გინმულინუა ორთას, ურთას, ჩქიმი ჸუდეშე კარაკანო მორჩქუნ დო შუმილ კოჩცალო გირძას გილაჯანუნ. გიმიბრულექ თუდო, მეულჷ ოთხირეშა, ირ გვიგვილს ვუფუჩონუანქ, ვოხუტოლუქ გინეფს, თულეფს მოფთხოზუქ დო შქურინაფილეფი ტყვიაცალო მირულენან, ძიცას ბღურუქ. ჩქიმ ჯინორ ჯოღორშა მევურქ, მუსხიშახჷრენ კეტიას ქოვუჸოთანქ, ინა ქუმომიღანს დო მა ოჭკომალს მილმუჭკომუანქ, ვოცქვანქ, ვუფერუანქ...
ეშვანობას ფუნს ზიტყვეფი, იზადუ ლერსი.
ათაშ, ჩქიმ ოზეშ ირ აკანს დიბლენქ, ირ აკანს ქომევუფერუანქ დო ეშე ეშმიბრულექ ჸუდეშა გინოლასირცალო, ჩუთმუვართე კომპიუტერს, (პარადოქსი რე ხომ ქო?) გუთმომნწყუნქ „ვორდიშ“ გოშირშინაფილ "ქარღადის" დო იბჭყანქ ბეშტუას... ფოთქვის მითოტყობინაფილ ჩხომეფცალო, ნამუსუთ მუთ შილებენ ნჭუაფილო ოკო ხეშ ქანჩუა დო აშო კილაჸონაფან თეშ, ფჭოფუნქ ეცუმილ ზიტვეფიშ გვართაშე თინეფს წიაკალო, მინს, ჭყანათ ეფშას, მინს, დაღარს დო უმურჩქვანუ აკანშა გითულირეფი, ჩქიმ „ქაღარდის“ გითმესხაპუნა უკულ ჯუმს ალნაჭოფა უნგვარუეფცალო. გიხვანცალუნა, გესხაპუნა, ვესვანჯუნა აკა წუნს...
ნაწი მიშნახოლეფი ჩხოუშ ბჟა, ჸვალო აკმურს უკულინ, ეთეშ აკილენს ჩქიმ ლერსი ხოლო ბოლოს დო მუნაწით გურხიოლერი დო ჭყანაგიშალიებური, ძიცაალაჸუნაფილო გილმემნჯირუქ დივანს დო ჭყანაშ მაკათაფალო კლასიკურ მუსიკას დინმიმნწყუქ ედომშამო.
ზუგდიდი 12.19.2013