მუშური ლერსი
| მუშური ლერსი by |
| მაკარ ხუბუა. მეგრული ტექსტები. ტფილისი 1937. |
მუშაშ ქიანა სარკილი დო
ბურჯუეფიშ მუნაფილი.
თექჲანი მუშეფი რენა
ღარიბი დო დინაფილი.
შრომა-ჯაფათ წამებული,
ხე დო კუჩხი შინაფილი!
ბურჯუაძენს დუდ მოწონა,
ითამს რენა გურაფილი.
მუშაშ შრომა, მუშაშ ჯაფა,
იშ შქირენით შხვაში რძღაფა.
ინენს მონათ კოროცხჷნა
ეთი ურძღაფელა მაფა.
მუ ამუდღა, მუ ჭუმანი,
იჸუაფუ აკონთხაფა.
ბურჯუაძენს ქუვოძირათ
ჩქჷნი რისხვა, ჩქჷნი ძალა.
ქიგუაშქვათ ბორზალი დო
დოურეკათ თინენს ზარა.
ოხერო გინურთინუათ
მუში ორქო, მუში ფარა.
თინენს ოკო უჩქჷდანი
ჩქჷნი მიზანი დო შარა.
მუშენქ თეში დიპწკაპათჷ,
წყარქჷ ოკო ვეკლართასი.
ართი ხმათჷ ვარაგვათჷ,
ვემკიტუათ აკა თისი.
ჩქჷნ ნაშრომი ჩქჷ მოკონა,
უჩქჷდანი თიში ფასი.
თინენქ ოკო მეხვადანი,
ვა ვარზენთი ისჷ შხვასი.
ბურჯუაძენს უძახჷნა
უჩა ტერი მუშაშისჷ,
მაღორებელ მუშაში დო
მასხუნალი უჩაშისჷ.
ტყებიშ მჷკმანწყჷმალი დო
მიდმაღალარ ლუკაშისჷ.
ორქო-ვარჩხილს აშახენა,
ხოპით მუნახუნაშისჷ.