მურუჟი ლენფერ ჭურჭული: ადამიერიშ მუმალიშ რწყება კოსმოსის
1990 წანას „ნასაშ“ კოსმოსურ ხვამარდიქ „ვოიაჯერ 1-იქ“ დიხაუჩა რეკორდულ გოძვენაშე - 6 მილიარდ კილომეტრშე (3,7 მილიარდი მილი) - გინიღჷ. კოსმოლოგი კარლ სეიგანქ თე ფოტო გიმირინუ მუშ წინგიშ ინმაჩამალო, ნამუდგასით ჯოხო: „მურუჟი ლენფერ ჭურჭული: ადამიერიშ მუმალიშ რწყება კოსმოსის“. გვალო მუდგა რენ 2 წანაშ უკულ თიქ დოღურჷ, მარა მუშ ტომბა დაკვირეფქ გაგინძარჷ მილიონობათ კათაშ ინოჩამა ედომუშამ მოსოფელიშ მასშტაბით. თე ვიდეო კარლ სეიგანს ეჯღუნებუ დო წუმარინუანს მუშ მესიაკონურ მეჯინალას კოსმოსურ ლაქაშე, ნამუსუთ კოჩიშობა დიხაუჩას უძახუნ. „მურუჟი ლენფერ ჭურჭული. ჯგირო ქოდეკვირით ათე ჭურჭულს. ათენა ჩქინ ჸუდე რე, თენა ჩქი ვორეთ. არძო, მით მიჸორა, მიდგაშეთ დღას მუთუნ მოირჩქილუაფჷ ვარა იჩინენქინ, ირკოჩი, მისით შურ უდგუდუნ, მუნეფიშ შურდგუმა ათე ჭურჭულს ეშაწირეს. ჩქინ ჭიროთუაშ დო ხიოლიშ გოართოიანაფა, მიარე ფულირ რელიგია, იდეოლოგია, ეკონომიკურ დოქტრინეფი, ჩქინ ბუნაშ ირი მაჯინი დო ოჭკომალობაშ მაზირალი, არძო გერგეზი დო ჩიჩიე, ცივილიზაციაშ ირი აკმაქიმინჯე დო მუმაჯილიკარი, ირი მაფა დო ფიოში, არძო მარდუ ჸოროფილი, ირი ნანა დო ბაბა, მენდით ეფშა ბაღანა, გუმმაგონებელი დო მარკვიე, ირი მორალიშ მაქადაქებელი, ირი კორუმპირაფილ პოლიტიკოსი, ირი სუპერმურიცხი, ირი „ჟინლიდერი“, ირი წიმინდე დო ცოდამი ისტორიას - ოხორანდჷ ათე ტვერიშ ჭურჭულიას, ნამუთ ბჟაშ ჩხორიეფს რე მიშაფულირინ. დიხაუჩა უგუთებუ კოსმოსურ არენაშ მორჩილ ეტაპი რე. ქაწირინეთ თოლშა, ზისხირიშ წყარმალეფი, ნამუეფით გენერალეფქ დო იმპერატორეფქ გარჩქინეს, მუნეფიშ დუდი ქიმწურჩქინუდესკო დო ტრიუმფით ქუმუხუჯუაფუდესკო თე ჭურჭულიშ უჭიჭაშ ნორთიშ ართ მერქაშიან დუდალან თიშენ. ქაწირინეთ თოლშა თი სადისტობეფი, ნამუეფით ათე პიქსელიშ ართ ძგაშ მახორუეფქ გიოტახეს დუდს შხვა თოლშა ონდეთ მალაფარ კუნთხუშ მახორუეფსინ, მუნერ შხირას ვარჩქილედეს ართიანიშ, მუნერ ძალამო ოკოდეს ართიან აკოუჸვილუდესკონ, მუნერ შიშთი რდჷ თინეფიშ ჯოგინი. ჩქინ აბანდვალას, ყინჩინს დო ტყურას თიშ გეშა, ნამდა თე ოქიანეს მუთუნ გიშაკერზაფილ აკან მიკებუნან, მურუჟი სინთეშ ათე ჭურჭული ანქარენს. ჩქინ პლანეტა ხვალახე ლაქა რე დიდ კოსმოსურ წკურუნტიას. თე წკურუნტიას, თე ვერწემ ოფირჩას ვა რე თიშა მიმაწურაფალ მუთუნ შანი, ნამდა მოხვარა სოლეთინ ქიჸუაფჷ, თიშო ნამდა მირსხან კინ ჩქინ დუდეფშენ. დიოდღარო დიხაუჩა აკა კაკალია აბანი რე ოქიანეს, სოდეთ შურდგუმა რენ. შხვა აბანი ვა რე, თეშიო თაშიო, უხოლაშ მუმალუს იშენ, სოდეთ შემალებენა გინოხორინინ. ვიზიტიო? ქო პატონი! დოხორინიო? დიო ვარი. მორწონა დო ვარინ, თე მომენტიშო დიხაუჩა ჩქინ აკა ორინალი რე. თაშ უთქუალუნა, ნამდა ასტრონომია თინერ მენცარობა რენია, ნამუთ დუგაჩიჩიენს დო კინე თე შვანს, გამორსას გინწყუნსიან. შორიშიან კოსმოსშე გინოღალირ ჩქინ აკაბუცხა ოქიანეშ სურათი, მუჭოთ რჩქუნ, ირიშენ უჯგუშ მეშქაშალა რე ადამიერიშ შურიშ ორძღაფალო. ჩქიმო თენა მიოწურუანს თიშა, ნამდა უმოს უჯგუშო ქიმევუდირთათ ართმაჟიას დო დოფთხილუათ დო ძივთი ქუმნობდვათ მურუჟ ლენფერ ჭურჭულს - ჩქინ აკა ოხორინალ ჸუდესინ!
ვიდეოშ ძირაფა ათე რცხუს შეილებუნა - https://www.youtube.com/watch?v=gpO5BevlOl8&feature=youtu.be