მურმან ლებანიძეს მარგალური ნინაში ლანძღუაში საგამათ
ჩქინათ სი დღას ვემირჩქინა,
ეშმაკიში ნაფუცქინა,
კოჩიშ თოლეფს დღას ვაგორუ,
ღორონც ვაუძირაფუნ თინა.
ჯვეში, ულირიში გჷმაშინე,
ზისხირ მიშაბდგჷ დო ფუბრუქ,
დუდი ნინას თოლწკურილო
ქომწი მუშენ ონდურუქ.
ბონას ვანორლინუე დო
ირიათო ორცათ მურქ,
მუდა საუკუნე ორე
ჩქიმ ფორუას ოცადუქ.
თქვან ნაჭარაში იშო ხოლო
ბრელ მაფინე ნაკითხერი,
დო თიცალეფი გჷთორჩინდ
ქოუჯგუ მუთუნი ვაბკითხენი.
სკანი ოღალიში მანთირალს
შემწეთ ოკო ოხოლდე,
მარა სი თის ოცადუქ,
დუც ქნნობდოხოდე.
ირო განთხის გჷთომღანთ,
ჯგირობუაში საგამათ,
მუ გეიძჷნა მარგალეფშა,
ქორაგადეთ არგამათ.
ვაიკითხირნო მუქ ალოლჷ
შურუბადო აქაბის?
მენძელურო მუკუხექ
მარგალიში ტაბაკის.
შხვაში სისმარშა ვენშერთინე,
ვევაშვინე ზღვა მითინს,
მა ჩქიმ დუდი ვებჩინი და
მი ვორექ მი მიწინს.
მარგალი კალდუში გამნარყი რე,
გირაგადუქ არგამათ,
მარგალშე რე გჷშნაულა,
ნამმუ, აფსუ, თიამათი.
ჩქინი რდ პირველ რელიგია,
ღორონთეფით ბრელ პუნა,
მარდუქ გიბილი, ნანა, უთუ,
ასე ხოლო გჷმართუნა
ირფელი არიკი ჸოფენია
მიქ გიწის დო მიქ გეჩის,
ბიბლია დო ყურანი ხოლო
გერცხილი ორე ჩქინი ნერჩის.
შხვადო შხვეფიში ქიანას
ქურუმეფო ვოხედით,
არათა დო უკული ეა
ჯოხო ჯვეშო კოლხეთის.
ქელაკითხე შუმერეთის,
ენგურას დო თაქ რიონს,
ქინშეშკვიდუქ მარგალურ
ზიტყვა ჩხორო მილლიონს.
ქორშუდას შხუ ოღალს
მაძღირკი და გოდირკჷქ,
ლერსეფ ჭარი დო თე ამბეს
მუშენი მიშეპოტიკუქ?
ნამთინე ჭირი შერგე ჸოფე,
მითინქ ვამონჯარუანი,
მარდის იბგანქ მარგალურო
ქჷდმოჭყაფეს ჭარუანი.