მუკოზგილატირჲ თანჯი

From Wikisource
Jump to navigation Jump to search
please do not remove empty parameters (see the template documentation).
მუკოზგილატირჲ თანჯი
by ზაალ ჯალაღონია

ბერწულიშ პიორიშფერ ოჭმარე
ათორე ცას.
მუნაფაშ დინოხჷ ბჟა გურცალო იფათქჷ.
წალიკონქჷ მიდეღჷ ჩქიმდე
მუსუთჷ სი გიფულუნდინი.
ცაშ ატატიას ქიმკაჭარჷ,
კარკაზელ ნოთელჯგურა ოწონდეს
ქუჭირინუ მუშ ონოფულე.
მა მუ, ამარ ვორექ ხებული,
დო მუკნასოფა ჸუბერცალო,
ჩილამურამი.
ცა დო დიხაშ ზვარა ბჯოხო,
წუნ დო მერქას აშებჭოფა ირიათონიშ
ხეშქაგურშა,
შარა ოლჷ იჭყაფუ, ჯიჭონეფიშ რანწკის
ეკოთხოზჷ მუკნასქილედ,
ჩქიმ ნორთიშ-ნორთი,
დუდ მეუღჷ ოშაყარუ აკანშა.
ზინდიკარი ხოლო გინწყუმუ თიშო,
გამაღეთ გინოკილერი.
ზორბაქი მუნაფას ოზნახუნა ჭვემეფი,
ჩილამურო გომიტეთია თუდო.
მა მის ვეზნახა, ჩილამურო დო მაფერო
გორჩქინაშე ქუმურჩქინუთ იშენ,
ჩე დო ნარჩა კუჩხით ქუდუკინებუქ
ორთას დო დუდ ქუნწყუაფჷ ჩქიმდა ტობაშა.
ზუგია, ოკუმაფუთ, დუხვამუ ჩქიმ ქარაბაკი.
ათაშ ვორექჷ გორჩქინელი,
პიორცჷ ქობძირუნქუნ
მაფერცალო ქათვარჩაფუქ,
არძა პეულც ჩქიმდა მოუღჷ დუდი.
მუ ერიაქ ოკო იჸუას, ზუღაქ ვეკმოჸოთასჷნ,
მაფერო გინორთელი კინ თის ოკო მიშვაწყორე.
ზუღაშ სქირი თოლუნჭაფუ რე,
თექ ხოლო პოფექ დო თევრე ხოლო მომღალჷ
სკანდა ჩქიმ შურ.
ზღოდელ ჩხომეფ გუმაფაფუდჷ ხასჷლას
დო მა იშენი თევრე მიფშ,
სოდეთ ირფელც დათებუ დო დაჭყაფუ ართო უღუდუნ.
თაგალერი ჩქიმ შური დო სქილედი
კინე ინმიშუაფუდჷ წყარც დო ეშმიშუაფუდჷ
თუთაშ ლუბაშო,
სოდეთ მიკოჭაბუდჷ ჩქიმ რინა,
ოშფა დო ტრედო გორთილი.
ასე იშენი თაკვირი მიღუ,
ვორექო თინეფი ირფელი მა ვარ,
ჩქიმ სისმარ გიაძირე
მიდგარენც, ნამუსუთ დღას ვადურულუაფუნი.

ადამიერ დინაფილი თანჯი ჸოფე,
ცაში ჸვაშე მუკოზგილატირი.