მოხუცებულობაშ ხანა
Jump to navigation
Jump to search
ვიშო ღორონთქ დოჭყუას
ათე სირჩინუეშ ხანა,
ვამაშვე დო ვამაჭკომე
დინაფილი მაფუ ძალა!
ჸუჯიშ რჩქილას მი თქუანსუ
სინთე ვედმალედას ვარა,
უკაცრავათ სკუალეფი
ბოდიშს ფთქუა თქვანი წკალა.
არშიყობაქ მემიდინუ
ტყურათ იპოპტიკუქ ვარა,
ენა ხვალე ჩქიმოთ ვარე
საერთოთ ორე ვარა!
მუჭო საძაგელი ჸოფე
კოჩი დუნორჩინუე,
მი რექინი ვაიჩინენცი
თოლემც ვანოძირუე.
უწუენი ვაგაიგონენცი
ჸუჯემს ვანორჩქილუე
ოჭკომალი ვააჭკომე,
კიბირ ქეგნოშირუე,
მუშოთ გოკო თეჯგუა რინა
ვაღურე დო იჸუე.
ცხოვრება მოკო ვარა,
ვართი მოკო იპოპტიკე
გვარო მიქა ვორექი დო
სახელ ბჯოხო იპოლიტე!