მოუთხილეთ მაჸალეფც
| მოუთხილეთჷ მაჸალეფცჷ by |
| გინმათანგალი გიორგი ბერია |
დრო მისოფუ, მეურცჷ თიში მამალას
ვეშგალებე გაფირქება, ჩიება.
უმიზეზეთ ვოდინუანთ მაჸალეფც.
ჭირც უკული თინეფიში შიება.
ცხენც გითანთხე, დეღამაკე შქაშარას,
კუჩხჲ მიტახე - უკულჲ სოთა გალინე.
ცხენ ვაგმოჩა, გურჲ გოუჩი, ვეჩქარა,
ცხენც ვაბრალა, ირფელჲ შარაშჲ ბრალი რე.
მუშო გოკო, დუდი დარდით ჸვილენი,
გურჷ გილეღე გოხარცქილი ჩხოროფათ.
იბჯოგუათჷ კოჩჲ წარსქვილი, კჷლერი,
მუ რე უჯგუ დანდება დო ჸოროფას.
ბონას იბდათ, ვეგნურთათჷ განიშე,
ვალჲ გებძჷნა არძას გინაგაფალი.
ბრელჲ ჯიმაკოჩჲ მითინც ვაჸუნც, ვართჲ იშე,
აბა, მიქ რე მუჩეს ოდინაფალი.
ასე მნარღე, გლახა შარათ იბდინი,
მათჷ ვაბჯერც, თენა თაში, ქორენი.
ჯიმაკოჩი მუზმა ვოჸოთჲ, იბდინე,
მათ გომჯოგეს, მოკო ასე ბგორენი.
მუ ჯგირჲ დღაშა ფულირჲ ჭირიშ ჩუალა,
მუთ მოკონა ნტერალა დო ნდურია!
შარა თიმწკმა რჩქინდჷნია, თქუანა,
მუჟამც ურემჲ ინე გამნირთუნია.