მოსე დო ვითი სარჯელი

იოსებიშ ღურაშ უკული, არძო მუში მოჯგირექ ქჷდოსქიდჷ ეგვიპტეს. თინეფი დო მუნეფიშ გჷმნარყეფი აგინძორენდეს რინას თექ ბრელი წანა აშაბანც დო ჸუნდეს ბრელი სქილეფი. თინეფც ჯოხოდეს ურიეფი.

მუჭოთ ბორჯი მუკმიშჷნ, ეგვიპტარეფქ დიჭყოლიდეს იოსებიშ ამბე დო ირფელი მუთ თიქ თინეფც უკეთჷნ. ეგვიპტარეფქ დოშქურონდეს ურიეფშე, თიშენ ნამდა ბრელი რდეს თინეფი. თაშინ, ეგვიპტარეფქ მუნეფიშ ჭკორეფო გჷნაშქვეს ურიეფი.

ეგვიპტარეფი ანძალენდეს ურიეფც ხანდას დო ეთმიოკიდაფუანდეს ბრელი ნოდგჷმეფც დო ედომუშამი ნოღეფცჷთ.

ეგვიპტეშ მაფაქ, ფარაონქ ქოძირჷ ნამდა ურიეფი კჷნე ბრელი ბაღანეფც ორჩქინანდესჷნ, ქუდოვჷ კანონი, მუდგაშ მეჯინათ არძო ბოში ურიაქ ოკო დიჸვილუკო თინეფიშ წყარმალუ ნილოსიშა გჷნოჸოთამათ.

ართი ურია ოსურც ქაშუ ბოშიქ. თინა დო მუში ქომონჯი ფულუნდეს ბაღანას თეიშახ, სოშახ შეალებედესჷნ.

უკული ქენახუნეს თინა კარაჩხას დო თეშ გოუტეს წყარმალუ ნილოსის. თინეფქ ქოთხის თიშ უნჩაში დას, ქეკოჸუნაფუდუკო თის, თიშ ოგინაფუშა, მუ მოხვადჷდ დო ვარი ბაღანასჷნ.

ფარაონიშ ცირასქუაქ, ეგვიპტარ ძღაბიქ ქოძირჷ კარაჩხა დო ქენიჯინჷ თიშა. მუჟამც ჩქჷჩქჷ ქოძირჷნ, თიქ მუში სქუათ გეჭოფუ თინა. თიქ მოსე ქგიოდვჷ თის ჯოხოთ. მოსექ დოხორეს ირდჷ დო დიდო ნაგურეფი რდჷ თინა.

ართი დღას, მოსექ ქოძირჷ ეგვიპტარი კოჩი ურიას ლახჷნდჷნ. მოსეს უჩქჷდ ნამდა მუ ხოლო ურია რდჷნ, თაშინ, თიქ ქეცადჷ მუში მაჸალე ურიაშ გჷნოტება.

მუჟამც მირჩქინჷ ნამდ მითინ ვაუჯინედჷნ, თიქ დოჸვილ ეგვიპტარი დო დონთხორჷ თინა. მარა მიდგარენქ ქოძირჷ მუქჷთ მოხვადჷნ.

მუჟამც ფარაონქ ქჷგინჷ თე ამბეშენ, თის ოკოდჷ მოსეშ ჸვილუა მუში ნაქიმინაშენ. მოსექ ინტჷ ეგვიპტეშე თექ, სოდეთ უშქურანჯო იჸუაფუდჷნ.

მოსექ ჭყიშალას ქჷმეთხჷ ხე ტიოზის, ეგვიპტეშე ბრელით დოჩილითაფირო. თიქ ქჷმიჸუნ ჩილი დო ჸუნდჷ ჟირი სქუა.

ართი დღას, მუჟამც მოსე გალე რდჷ გჷმულირი მუში შხურიშ ოჭყიშუშან, თიქ ქოძირჷ ბართვი ნამუსჷთ დაჩხირი განტუდჷნ. მარა ვარდჷ თენა უბრალე დაჩხირი, თიშენ ნამდა ბათვის ვაჭუნდჷ თინა. მოსექ მიაკინჷ ხოლოშე გაჯინუშა. მუჭოთ ქიმიახოლჷნ, ღორონთიშ ხონარქ ქუდურაგადუ მონტებული ბართვიშე.

ღორონტქ უწუ მოსეს: „მა ბძირი ჩქიმი კათაშ ჭიროთი. მა ქუგოჯღნა სი ფარაონშა დო დუგორსხებაფუა ისრაელიანეფც ეგვიპტეშ ჭკორალაშე. მა ქიმებჩანქ თინეფც ქანაანიშ დიხას, დიხას ნამუთ მა დევეაპიანი აბრაამც დო იაკობისჷნ. „ მოსექ თქუ: „ მუჭო იჸი, კათაქ ქობკითხჷ-და მიქ მუმოშქვჷ მა თინეფშან, მუ გამა მებჩა მა? ღორონთქ უწუ: „მა ვორექ მით მა ვორექჷნ. ქუწი თინეფც, „მა ვორექ-ქ“ მუმოშკუშო თქვანდა. თენა იჸი ჩქიმი ჯოხო ირიათონო.“

მოსექ დიდო დოშქურონდჷ დო ვაკოდჷ ულა. თაშინ, ღორონთქ მუში ჯიმა, არონი ქუმუშკვჷ თის მახვარებუშა. ღორონთქ გათხილჷ მოსე დო არონი ნამდა ფარაონი ორჩანი იჸუაფუდჷნ.

მოსექ დო არონქ მიდართეს ფარაონიშ დარაგადაფუშა. თინეფქ უწუეს თის, ნამდა ღორონც ოპიანუდ თიქ ურიეფი გადუდიშალუკონ. ფარაონქ ქჷგიაძიცუ თინეფც. ურიეფიშ გოდუდიშალაფაშ მანგიორ, ხოლო ქუმუძინჷ თინეფც ხანდა!

ფარაონი კათაშ გოტებაშ ვარიას გერდჷ ირიათო, თაშინ ღორონთქ ვითი სარჯელი ქუმუშკვჷ თის. ღორონთქ ქაძირუ ფარაონც, ნამდა თინა რდჷ უმოსი გერე, ვინდარო მუ დო მუში ღორონთეფი.

ღორონთქ წყარმალუ ნილოსი ზისხერო გინაშქვჷ, მარა ფარაონი იშენით ვაუტალენდჷ ურიეფც.

ღოროთქ ქუმაშკვჷ გორდეფი ედომუშამი ეგვიპტეშე, უკული კოღონეფი დო უკული ჭანდეფი.

ირი სარჯელიშ მოშქვაფას, ფრაონი პიჯალას დვანდჷ ურიეფიშ გოტებაშ, ღორონთი მეჭყვიდუნდჷ სარჯელიშ მოშქუმალასჷ-და.

მარა ირი სარჯელიშ მეჭყვიდუას, ფარაონი თირანდჷ მუში პიჯალას დო ვაგადუდიშალენდჷ ურიეფც. თაშინ, ღორონთქ ხოლო ქუმუშკვჷ სარჯელეფი. ირი გეჸვენჯი სარჯელი, ხვალე ეგვიპტარეფც ონუდ დო ვამჷკმანჭჷდ ურიეფც.

გეჸვენჯი სარჯელი, მუთ ღორონთქ მაშკვჷნ, რდჷ ლახარა, ნამუქუთ გოჭყვიდჷ არძო ორინჯეფი ნამუეფუთ ეგვიპტარეფც ორხველუდესჷნ.

უკული ღორონთქ მაჭვერი ჭყოლეფი ქუმუშკვჷ ეგვიპტარ კათეფც დო ურიეფქ კჷნე უნებელო ქჷდოსქიდეს. ღორონთქ ხოლო უმოსო ქუჭუ ფარაონც გურც, მარა ინა იშენით ვაუტალენდჷ ისრაელიანეფც.

თეშ უკული, ღორონთქ ქუმაშკვჷ კირცხი, მუქუთ გეგნობელეკუ მუნაწი ეგვიპტეს დო დოჸვილჷ არძო მიდგაქჷთ გალე გჷმილჷნ.

ირფელი თე საზარო სარჯელეფიშ უმკუჯინუო, ფარაონქ იშენით ვეგიტახჷ გური დო ივაურ ურიეფიშ გოტება.

თაშინ, ღორონთქ კოლეფიშ ლესქერი ქუმაშკვჷ ედომუშამი ეგვიპტეშა. თე კოლეფქ გეგნოჭკომეს ირფელი მუნაწი, მუქჷთ კირცხის გჷნასქჷდჷნ.

უკული ღორონთქ ქუმაშკვჷ უკუმელა, მუთ სუმი დღას იგინიძორებუდჷ. თიშნერი უკუმელა ორდჷ, ნამდა ეგვიპტარეფც ჸუდე ხოლო ვადატებედეს. მარა სოდეთ ურიეფი ოხორანდესჷნ, თექ ნათერი რდჷ.

თე ჩხორო სარჯელიშ უმკუჯინუო, ფარაონქ იშებ ივარუ ისრაელიანეფიშ გოტება.

ართი სარჯელი რდჷ დოსქილადირი, მუდგაშ მოშქუმალათ ღორონც გურშა ალუძჷდჷ, ფარაონი ველერჩქილუანდჷ-და. თენა დოთირანდჷ ფარაონიშ ჰონიას.

მოსექ დო არონქ გართხილეს ფარაონი, ნამდა ვაგუტალენდჷ ისრაელიანეფცჷ-და, ირი მაართა-ნაბადი სქუა დო ირი მაართა-ნახა ორინჯი ხოლო ედომუშამი ეგვიპტეს დოღურუდჷ. მარა ირფელი თეშ უმკუჯინუო, ფარაონქ იშენ ველერჩქილუ ჸუჯიშა.