მოგურაფუეფიში ობირეში

From Wikisource
Jump to navigation Jump to search
please do not remove empty parameters (see the template documentation).
მოგურაფუეფიში ობირეში
by ჯვეში მარგალური პოეზია
იოსებ ყიფშიძე "რჩეული თხზულებანი" თბ.1994წ. ხ.320-321


ოცქვაფალი რე თი ბოში,
მითი ჯგჷრო იგურუანს,
ინა უჸორს მაგურაფალს
დუს ხეს უფუჩონუანს,
აჩუქენსჷ დო ოცქვანს,
დღას ვა გიჭყოლიდუანს;
ნანასჷთი თინა უჸორს,
ხურხის იხუტოლუანს.
მითი კლასის ეშმაკენსი,
ირო ორთჷ უბადოს, --
ინა ირო ჩიჩიე რე,
კოჩი ვჸეჸი მუთუნ დროს;
მარა მითი ჯგჷრი ლე ნი,
ინა უჸორს ირი კოს.
მიქჷთი ჯგჷრო ვჸეგურუასი,
ნუმჷ განჯანს ინა თოლს.
მითი კლასის შვიდი რე ნი,
ეთი ბოში ორე ჭკვერი;
მარა ინა მუშა ღჷრჷ,
მითი ვა რე წესიერი?
უჯერო დო უთოჸუჯეს
ტანჯა მოძჷ ოშინერი.
კლასიშ ნარდი ჭკვერი ბოში
კოჩოთ იჸი ბედინერი.


2.

ურჩქილი ჯიმა, გეეგონე,
კლასის ქორეკჷნანია,
ჭიჭე ბოშეფი იკათუნა,
გურაფას დითმიჭყანანია,
ჭკუას ძალას არძენა ნდო
ზნეს ისწორენანია.
ქრისტექ მუ ამბეფი ქიმინუ ნი,
არძას ზეპირენანია;
მუ ზოჯუა მუჩესუ ნი,
თექი ზეპირენანია.
მუში ზოჯუა თენა რე --
ბოშენქ არძაქ ირდანია;
მითი თეს ვჸექინსი ნი,
არძაქ მუშათ იდანია,
მუნეფიში სიცოცხლეს
მონკა ოღალე ზიდანია,
სინთეს ვე ეღირსებუნა ნდო
რუმეს მითიბურსანია.