მიყვარს ლაჟვარდის ალმასი
Jump to navigation
Jump to search
| მიყვარს ლაჟვარდის ალმასი ავტორი: გიორგი ლეონიძე |
მიყვარს ლაჟვარდის ალმასი,
ზედ მთვარის პირი ნამგლური,
ცა მინანქრული, ლამაზი,
ცისკრულად გადანამქრული.
ნაწვიმარ ნაძვთა ნაწური,
მდელოზე დანაცვინარი,
ვენახში ვაზი გაწნული,
მტკვარი კაშკაშით მცინარი...
და გულის ნამეტნაობით
ზღვა სიყვარული ამტყდარი...
ლექსი, ოცნებით ნაომი,
მზე ― ჭიმჭიმაზე დამდგარი...