მერანი (მამანტი კვირტია)
| მერანი by |
| ორიგინალური ნინა ქორთული. ორიგინალური ჯოხოდვალა მერანი. გინმათანგალი მამანტი კვირტია |
მეურც, მენქვერჷნც უშარე შარათ ჩქიმი მერანი
ეკმოჯღვიანა შურუბადო უჩა ყორანი
გოურქი ირული სი ჩქიმი მერანი
უხურგე ორე თე რულა სქანი.
გოსოფი ბორია, გაკაბი წყარი
დო უჩა ფირქეფი თეთ ქუდამიწყნარი.
ვამუთხილუა ჩქიმი მაფურინე
ვართი სინჩხე დო ვართი ძრიძღალას.
ვართი მა გეცოდა ათე ჭურჭინც,
ჭუმენერი მენდი ქომუჩანც ნძალას.
მა ვამიჩქუნო მუთა უჯგუნი
ახალი ბედიშა დუდიში მეღალას.
იბდათ, გურქიათ ვალიში მამალას
გური ვაუჩათ რობუ დო გვალას.
გურქი, ირული სი ჩქიმი მერანი
უხურგე ორე თე რულა სქანი.
გოსოფი ბორია, გაკაბი წყარი
დო უჩა ფირქეფი თეთ დამიფარი.
მა ვაფთხორედა ჩქიმი ოდაბადეს
ჩქიმი ჯვეშეფიში ოკათაფურსუ.
ვაბჭარაფუდა ჸოროფილიში
გეთვალუა დო ჩხე ჩილამურცუ.
უჩა ყორანი, ტიოზი მინდორც
ჩქიმო საფულეს გეშანთხორჷნცჷ.
დო ქარბორია მა უმინჯურცუ
დიხათ, ფეშერით გაკოფობრჷნცჷ.
გოურქი, ირული სი ჩქიმი მერანი,
უხურგე ორე თე რულა სქანი.
გოსოფი ბორია, გაკაბი წყარი
დო უჩა ფირქეფი თეთ დამიფარი.
უბადოთ იშენი მუჭო ითებუ
თე მიკოჭვილიშ შურიშ ცირცინი.
დო მოჯიმალენც ქაწოხვადჷნა
შარა წყვაფანა, ნაჩართა ჩქინი.
ნამდა ჩქინ უკულ ჩქინ მოჯამალენქ,
ხანდა ვაძირან შარაშ თინუას
დო თის ვეცადათ ჩქინ ნაქიმინაქ
ჩქინ უკულიანც მულექინუას.
გოურქი, ირული სი ჩქიმი მერანი,
უხურგე ორე თე რულა სქანი.
გოსოფი ბორია, გაკაბი წყარი
დო უჩა ფირქეფი თეთ დამიფარი.