მაჸალე

From Wikisource
Jump to navigation Jump to search
please do not remove empty parameters (see the template documentation).
მაჸალე
by გიორგი სიჭინავა
წყუ:გიორგი სიჭინავა "ნანაგე" თბ.2011წ.ხ.189-190

ართი ბორიობა სერც ბათლომეს ჸუდექ დააჭჷ. თიში მამალას ქიგეცუ ტუტათ სკვამი ოდაქ, მუთუნიშ გიმოღალაქ ვაჭიშუ ნამთინც დო ქჷმწოსქიდეს მინდორც ერებამო. ბათლომეს ართი მაჸალე ყუნდ, სახელო ისიდორე. ჯოგი აფუდ თის გიმნაჩემი დო იფირქ, გეიწვესხენქია ფარას, ახალი ოდაში ეიოგაფალო.

მაჸალე აბა მუ მაჸალე რე გაჭირებას მუში ხუჯიში კოც ვალუდირთასინი. ზიტყვას ოკო გურიში ჩამა: ჸა ჯალეფც გოჩანც. თინეფი ართი ჯაში ტანშე რენა მუკნაფალა. კოჩიში მაჸალე შხვა დიდა დო მუმაში სქი ორე, მარა ჯვეშ მარგალც ჯაში ჸალეფშა ქიმუგურუაფ თინეფი დო ართი შური დო გურით ართიანწკჷმა გინოსქვილეფშა მაჸალეფი ქიგუდვალ.

ქიმერთ ბათლომექ მაჸალეშა დო ქოთხუ ფარა: ქიმმესხია დო ართი წანაში უკული დოირთინუანქია ურკებუო. იჩაკვირ ჭახანც ისიდორექ დო ვარია ქოუწუ მაჸალეს: მაჸიდეს დიო ვამუღალჷნია ჯოგიში ფარა, სუმი თუთაში უკული ოკო მისურასია. ბათლომეს მეუდინ იმენდიქ. სუმი თუთაში უკული ზოთონჯი მაჭიშუანდ დო ვართი დაჭყინედ ჸუდეში კეთება.

ისიდორეში ოსურქ ქიგეგონ თე რაგადი, გალე გიმილ ჸუდეშე დო დახე გიტყაბარუ ღვა. მუ გეგონუა ჩქიმ ჸუჯეფქ, მუნერი ტყურა უწუა გაუბედურებული მაჸალეს; ნარღენდ ოსური, მარა ქომონჯიში გინორთი მუ არაგადედ დო გეუნჭირჷ კიბირი ნინას.

მიდართ გაცუდებულო ბათლომექ დო ქიგიაჸუნ გაბგარებული გურით შარას. ისიდორეშე გური ვამორთუმ. მუჭო იფირქენდ მაჸალე ტყურას უწინდჷნი.

ბათლომე გეგნაზარ ოზეში ხიბაშა ისიდორექ დო რულაიათ გემნოსოფ ჸუდეშა. გაანჯ კიდობანი დო გეშეღჷ თევრე პინტის მეკირილი ფარა. უკული ხანგაცალო გაგმოლ გალე დო უკახალენი ღობერც გეგნოსხაპჷ. ოკვათაფუთ მოჭკირ შარა. ოსურქ ქჷმაკინდუ თოლი კიდობანშე ფარა ეშეღჷნი, მარა მუს თუთმაცენდ თე მუში ყაზაყინ თეშა გვალო ვაჩინ გურქ. ფარამო ეკათხოზუნი, მეჩამა ქაკოდჷ-და მუს აწვალენდუა თეზმას იშენით გაწვალებურ კოც.

ბათლომე მიშ გური ჭვილო დო მეფურცქინუნდ შარა-შარას. ტყაში პიც მიანჭჷნი, შქა შარას ქოძირ მუდგარენი მეკირილი გილაძჷნი. იშო-აშო გიჯინ მარა სოლეთინი კოჩიში სისანდობა ვარდ. თი აკანც ვახორანდ მითინი. გეჭოფ თე მუდგარენი, გონწყ გოსქვილი პინტი დო თოლეფც ვადუჯერ: ტკვაჩილი ფარა მილნოკირუე დინახალე. სისმარო ვორექიაო, იფირქ ართი შვანც დო მანგარო ქიმიწკიტონუ ღვანწკიშა, მარა მუქ ოკო ითირკო, ცხადი ორდ ირფელი.

ჸუდეშა დორთელი ისიდორეს ოსურქ უწუ: დიო ვარია ქოუწი, გური გამკუჸოთი დო უკული ფარამო ეკათხოზი ოკვათაფუთუნი, თენა მუ ორდუა? მესხება გოკოდუადა თაქ ვარჸუნდუაო, ამარი? ეჯგუა გაჭირებას, მესხება ვარ, გვალო აჩუქენცია ფარას ჯგირი კოჩი მუში მაჸალეს.

ისიდორექ ყებურც ქჷმშადოხოდ დო ჭახანც მუთუნი ვათქუ.

-მივესხიკონი ვაგინედუა ბათლომეს თეზმა ფარა დო გემწარებუდუა ორჩინელც. -უწუ გითოჸუნელო ისიდორექ. -ვაჩუქიკონი ხოლო უფრაში იჸუაფუდუა: მონათ გინმართუდუა დო მივოდინუანდია მაჸალეს. ვარა, მუ გემო უღუნია ნაჩუქერი ჸუდეში რინას. ასე, შარას გილახვილაფირი ფარას, ღორონთიში ჭყოლოფათ მირჩქინანცია ბათლომე დო ხვამა-წირუათ გასურენცია მუში დღალეფც.

უღორონთე კოჩი ვადეჯერც თე ამბეს. ვარა მუჭო ოკო დეჯერას მუჟამცჷთ, თის ოცად, სოდე ლიშის მუკაბინანცჷნ თევრე არგუნი მუკონწყასჷნი, მარა ორდეს ისიდორეჯგუა კოჩეფი. თინეფი ვარდესკონი ამდღარი დღაშა ვამართედ თე ქიანას.