მარყე-მარყეთ ეკოპუნა ბორჯეფი

From Wikisource
Jump to navigation Jump to search
please do not remove empty parameters (see the template documentation).
მარყე-მარყეთ ეკოპუნა ბორჯეფი
by ზაალ ჯალაღონია

მარყე-მარყეთ, ეკოპუნა ბორჯეფი.
თოლიშჲ სინთე თუთას ქიმშაჭვათაფე.
მოლამბირი შოშეს ლანდი მონჭაფუ,
მარჩებელჲ დო მარაგვინჯე, მოთარე.

მარცახეფი ქიგმობინუ ბორიაქ,
მარცქინე რე გორჩქინა დო ორთაშე.
ორცხონალო ნდოლო აკომგორია,
მარეხეთჷ ვორექია დორთაშე.

ჩქიმჲ მარჯვალი ხოლო ოკო ქოძირე
მასილარი შური აკომკორობი.
ცაშჲ კიდირცჷ სერდაშ ბჟათჷ დობზირექ,
კოდმე-ტკილი კოდორელი მოროხი.

მაფალაგა ცხენიშჲ ძუათ დოკირე
ჩქიმჲ რინა დო სოთინჲ ვაკო გონწყუმა.
მაქადარი ვორექ შურიშჲ მოთირე,
მაჩხაპელა ჭვემათ მიჩქუ დოწუმა.

მაქურსალო ვეგლაფხვადა გიჩქუდას,
ჭარა რექ-და ჩქიმდა მუთას გალჷმე.
თის ქობძირჷ ბირგულეფი გიშქუდას,
ვედეღორა, სი სოთინი გალინე.

მეშვე თუთა, ოხუტოლუ გაბარეფც
ოსოფინალჲ კინჲ აღვენუ არგამათ.
ლილუ სქუა ხეშე გეიოჭაბარეს,
ამსერჲ თუთა გილაგორუნც ბაღანას.

ისხარსახალჷ ოვარდე დო ოსხულე,
ოსხუნური ირფელც ქუმონარტებუ.
თაქ ვორექჷნჲ ვითოჟირშა დოფსხუნეს,
ჩქიმჲ დუც იშენჲ მა ქიგვოდვი მარტებუ.

ოტომბეშე მა ჩხომცალო გეშაბლი,
ოფონც იშო კალმახეფჲ ცას ჯუნუნა.
ამსერჲ თე ცას ბორია რე გერშვილი,
კალმახეფი მარჩხას ვემიაჸუნუნა.

მარყე-მარყეთ ეკოპუნა ბორჯეფი.
თოლიშჲ სინთე თუთას ქიმშაჭვათაფე.
მოლამბირი შოშეს ლანდი მონჭაფუ,
მარჩებელჲ დო მარაგვინჯე, მოთარე.