მარგალური ლერსეფი
ხორციელი ჸოროფილი მუჭო განშორებულიე!
ჩქი ართიან ვამჸორდანი, ბრალი მონდომებულიე.
ჩქიმ დო სქანი შეერთება ფიფქრე მოხოლებულიე.
სქანი მეტი ჩქიმი წკუმა არძა მოღორებულიე.
მოკო ირო უჯინედე სქანი სქვამი თოლეფ ხანტირს.
სქანი ღირსის ქოპონქჷდა, შეგისრულე გურიშ ნარტის.
ტანჯვას დუდიშა ვე მიბრკე, ირო იპიქ შრომა -- ხანდირს.
კამენდიათ გინჷგართუქ, ძიცათჷ რჩანქ ირო სადირს.
მაფშალიაქ მეურქია, თიშა მაფუ ოჩინალი.
ღურა დღასჷ სი მოკოქჷ ჩქიმი თოლიშ მარწკინალი.
გაჭირებულ ჩქიმი კუჩხეფს მითინ ვა ჸუნს მათინალი.
ოშა-გოშა მიძირუე, ეს ვა ჯოხო სამართალი.
უბედური ჩქიმი დუდი, მუჭო ბედი ჭვილი მაფუ!
ირიათო გორწყედენი, მუჭომ ჯგირი იჸუაფუ!
სქან უმუშო ჩქიმი გური ვა ტიბუნ დო რგილი მაფუ!
ცოდა ქორე ჸოროფილქჷ შორ-შორიშე იწვალასჷ.
თინა ღორონთქჷ დოჭყუას, მიდგაქ თენა მიძრახასჷ!
ძაძუ ეჯიბია. 1921