მაჟრა მულაშა ვამოჲგორუა
Jump to navigation
Jump to search
შური, მუშენ რე ცაშა მეული?
კინე შილებე... აშო მიკირთი,
სო მიკახომე სქანი პეული,
ომორგუალეთ მუჭო გინირთი?!
ქიმთაპუროსკი დიხას გორჩქინა,
მოიგორუანც სიხოლო თარა,
ართ წუნჲ დეჸანი, ზიტყვას გოჩინა,
ჟინცაშ მუნაფა ვარე ნაშარა.
მელახიშ ჭვემათ მუშენ ერჩქინდი,
ირ ბორჯის ხუჯი მუჭო გათირუ,
წოხლე მაფალუ შურიშ ნერჩი რდი,
ამდღა დინაფილ რინაშ მახირუ.
ზუღას გიფიორ ჩქიმი დღალეფი,
ეუქექუანც მინშა ბორია,
სქირაფილი რე სქანი ღალეფი,
ფსუა ვეფაჩე, ვარე დორია.
უჩინებ შარას გეჸუნქ კინენი,
ვაგორხველჷნო წანაშ წყორუა,
ჩქიმ ჸურე შურო ვემკიჯინენი,
მაჟრა მულაშა ვამოჲგორუა.
2014 წანა, ღურთუთა.