ლური

by სერგო წურწუმია

please do not remove empty parameters (see the template documentation).

ლური by სერგო წურწუმია

   
ცაშ ნოჸელას თუთაშ ელაფალუა,
მურიცხეფი ვესჷ გეკაჭალერი...
ექი-ექო ჯოღორეფიშ ლალუა,
წკვარამიათ გინოფორჩილ ჭალეფი.
დობერეფი რეღმაშ გჷნაქურჩინა,
აბირაფილ ბორიაში ცირცინი...
შელორსეფი სერიშ დჷნაფურცქინა,
ოჭვათჷრეს ჭიჭკაშ ალაწირწინი.
ორქოშ ოლჷთ ჟჷნიშ გიმაჸონაფა -
რუმეშ ტჷშე სისმარი გჷთოჭვალირი...
მუმულეფიშ ბარჩხილ მეჸიონაფა
დო ლაკადა ლურით გინოჩალირი.

ფრევალიში (ფურთუთაში) 15, 2015 წანა,
ქუთეში.