ლერსიშჲ მენდულო
Jump to navigation
Jump to search
ლერსიშჲ მენდულო ქჷდოვსკილადექ,
დიო წყარალა, უკულჲ ნაწყარი,
გურცჷ ჸოროფა გევობირაფე,
ოწმახ მიჩქუდჷ არძა ლაწკარი.
დინოხ იბარბანჩ ქერეთ-გოლოფა,
ლერსიქ ქიმკარდუ გურიშჲ ნაფალას
დო მა ფირქეფი მომიღ ჩხოროფა,
აფუნიშჲ ჭვემა გიმოჩხაპალანს.
ღიობო დიბტე გური შუშელი,
ვამოხვარჷდჷ ნგარა-ნირზინი,
ალბეთ, ცაშე რექ გიმნაშკუმელი,
თეზმა ბორჯისჷ ქჷგამირზინი.
დეჸან, ხანგა რექ, ჩქიმდე რტებული,
ჰავას ქაჸუნი, სოლეთ მორთინი,
ჯაქვაბორიას სქანი მენდული,
მიდეღჲ, მემიჩამ არძა კორინი.
იშენთ ვამოკო ხვალე ვღორუე,
გურიშჲ ნაბირა ოკო მოვთანჯე,
ქიმმოწურაფე, ქიმივგორუე
სქანჲ ოხვენჯი დო სქანი ოგვაჯე.
ლერსიშჲ მენდულო ქჷდოვსკილადექ,
დიო წყარალა, უკულჲ ნაწყარი,
გურცჷ ჸოროფა გევობირაფე,
ოწმახ მიჩქუდჷ არძა ლაწკარი.
2014 წანა, ღურთუთა.