ლანდღვე სერი, ლაშაშჲ სერი
Jump to navigation
Jump to search
ლანდღვე სერი, ლაშაშჲ სერი,
გჷთოჭვალირი თუთაში სინთე,
ბირგულჲ მიშქუ, ჯვარჲ დებწერი,
ჭვილ გურქ ხურხის ქჷმომინტუ.
გინობორთელი გვალეფი რე
თჷრით გინოსილონგირი,
თაქ უნინეთ ხოლო გაბირე,
ვაჲჩქჷდასჷნჲ , გოკონჲ, ბირა.
„წიწინაფილი ჩაფლა ლუღის
ბერწულჲ ათაკარკაცანსჷ“,
შურჲ მაჭარო გეგნობხუხი,
შურიშჲ ასე მეტო ბწანსჷ.
ხობიწყარო ცა მოწენსჷ,
თოლმორღია, თოლი ჯღარუ,
მუხურიშე თოფურ ცენსჷ,
მათ მუხურქუ მჷმეხვარჷ.
კუჭუხაშე ნაჯინათჷ
თოლქჷ ჯუმითი დომილანტჷ,
გეგნობორჷ ნაჩილათჷ,
წყარქჷ ნაწყარჷს წყარი ქატუ.
მიდაბზოჯათ უღურუშა,
გებზადათჷ ჯვეშჲ სიხოლა,
კოტე, მოლა მუხურიშა,
მუხურიშა, კოტე, მოლა.
1.03. 2015 წანა