ლაზუტი
ამერიკაშ გუნარჩქინა
კოლხას აშექვაჩალუქ;
ზუღაცალო მეხექ ჸვანას
უბადო გურს აჩამუქ.
ირკოჩჲ ართო გუგალუაფჷ
ბოში რენ დო ძღაბი რენ;
ოდოია გოჭყოლადირჲ
მარგალჲ კინე ქაბირე.
დიო დიხას დოგიხონნა,
უკულ დოგიფარცხუნა;
უკულნე კვალს ქიმერჩანა
ჸვანას ართის ვარცხუნა.
უკულ ჭკემო დორთასუნა
დიხას ქიმთგოჩუანა,
სქან ეულას უჯინენა,
სქან დუც იფუჩუანა,
უკულ გეურქ, გამწირდუქ,
მოულა დო რბარგუნა,
ტყალეფს ჩაგირცხინუანა,
ჯინს გითოგიქარგუნა.
ჭახანს ხოლო გაცალენა,
ძინა – მოჩიტოლუას,
მაჟირუას გარჩქინანა
ბერგიშ უფით შოლუას,
უკულ სქანო მიგაშქვანა,
ქუჩუჩუას ელუნა;
ფურჩა მუჭო მოგიხომ დო
ჸვანას აშენქელუნა.
სირმაჯგურა კაკალერეფს,
ტარეფს ელარტახუნა,
გიდელს ენგოკოროფანა,
მაღაზას გინახუნა.
ფურჩას ფურჩათ რსხუნუნა დო
ჭას კილ–კილო რკირუნა;
ქიგერდგუნა ანწალათ დო
ზოთონჯიშო რზირუნა,
უკულ ტარს გიკაკალანა
ჩე–ჩე კაკალ– კიბირით;
ოქუმს ქეგთგოქუანა დო
დორცირუნა ტკიბირით.
ღუმუ – ელარჯო ქუდგოგანა,
სქანით ქვარას იფშანა;
ოჯალეშის გედაცუნა,
უკულ მიშმაკიჩანა.
ართის ვა გოდინუანა,
სქან ირ მეკონს ხვარენა;
ღუმუ დო ჭკიდო გინგოშქვანა,
აწუძუთ დო ხარენა.
ათაშ ორე ლაზუტი თენა,
მარგალ კოჩიშ ჟინო რექ;
მარგალ კოჩიშ ოფუჩური
თიშ ოზე კარს დინორექ.
იანარიშ 25, 2004 წანა.