კინ მაჟირაშა მა თაქ გობრჩქინექ

From Wikisource
Jump to navigation Jump to search
please do not remove empty parameters (see the template documentation).
კინ მაჟირაშა მა თაქ გობრჩქინექ
by ზაალ ჯალაღონია


 ორთა სუალეფს უფათქუანცჷ,
 ფირქეფი მუკობუ ცას წილამურო.
 ჩე ჯაშ ნოჸელეფს გილაღვარღვალჷ
 ათე ნაბირა ჩხე ჩილამურო.
 ჩქიმი ლერსეფი ცაშ ობინეხეს
 მუკოჭვიანა ჸურზენ–ჸუბერო,
 მუ შვანც ღორონც შურც დურთინუანქჷნ,
 კინე გინმოშკვანც დიხაჭუბერო.

 ჭარა ხაბოშე მოკერკელუანც,
 ფუთქურ მოლებულ მუჭოთ ქუასჷ.
 ათე ბორია სუას მეპტახუნც,
 ამარ მოლიმ დო მიქინძუანცჷ.

 ირო მისხუნუ დღალეფ მობრდენი,
 ბრელ მიძირუ დო ბრელით ბდინაფუ.
 სოლე მობრთინ დო სოლე იბდენი,
 ირფელ ართიანც ქიმენქირაფუ.
 შურიშ ტორონჯი ცაშე მიჯინე,
 თექ ხოლო ნოღვე ირფელც აკართუ.
 მა თი შარასჷ თოლი ქუკინდე,
 თანთე მუნაფას ნამუთ აკათუ.

 ამარ გევორექ რზენიშ ოხურგეს,
 შურ მიკიჩხილიტ, სო რე ფაფალას.
 კინ მაჟირაშა მა თაქ გობრჩქინექ,
 თოლიშ მერქას დო წუნიშ მამალას.